2021-06-11

廁所怪招求婚冧掂梁諾妍洪永城︰今年內行禮

　　【晴報專訊】37歲的洪永城（Tony）與長跑教練兼模特兒女友梁諾妍（Inez）拍拖兩年多，二人昨晨正式公告「我哋要結婚啦」，為娛樂圈帶來喜訊。Inez披露Tony失驚無神在家中廁所求婚，貫徹其鬼馬性格；至於Tony接受《晴報》訪問時，透露與未婚妻現時邊忙工作邊籌備婚禮。

　　Tony與Inez昨日雙雙在社交網發文報喜，並分享早前拍下的結婚相。Tony留言︰「由一齊跑步到傾電話、睇日出、拍拖、不計劃的旅行、扮攰逃避跑步、通宵睇動漫、同居、到我們至愛Coco（愛犬）離世、到今日一齊攜手踏上我倆的新旅程。」他又發表愛的宣言︰「好在有你緊握我手，我希望一世都有你在身旁，追到你是我的僥倖，娶到你是我的福氣！Let's get married！」Inez亦發文稱︰「下半生手拖手，繼續一起跑下去，繼續跑去世界每個角落。」Inez受訪時，回想在家中廁所被求婚的經歷，既搞笑又感人︰「當時好多蝦碌嘢發生，佢喺屋企個廁所度求婚，我覺得好好笑，不過好係佢嘅style！」她指當晚Tony完成工作回家，即急急入廁所一段時間才出來︰「我人有三急，當我打開廁所門，原來佢布置咗一個攝錄機，又喺洗手盆度放咗啲微型燈泡，又有一束鮮花，鏡上又貼咗啲心形卡，仲寫上『MARRY ME？』。」

黃翠如感恩老友變人夫

Tony反傳統以T恤配煲呔影婚照，Inez的左手亦大騷婚戒。

　　Inez即追問男友何解在廁所求婚︰「佢話知道我一定會去廁所，最好笑係佢拎隻戒指出嚟求婚時我真係好急，你等一等我去完廁所先，結果佢要等我辦完大事（大便）再求婚，我就say yes！」至於二人的婚照亦非常有創意，服裝及照片風格也充滿運動元素。Tony昨晚回應時，透露是在今年農曆新年後求婚成功，他說︰「之後我籌備監製嘅電視劇《凶宅清潔師》，Inez就專注健身中心搬舖同拍攝節目嘅事，依家一邊忙工作，一邊籌備婚禮，婚禮會喺今年內舉行，落實日子會開心share畀大家。」Inez昨晚也在IG發布限時動態感謝各界祝福。