鄺潔楹不服輸的哈比女神

　　【晴報專訊】無綫小花鄺潔楹（Judy）樣子甜美，加上155cm的可愛系身高，被宅男追捧為「哈比女神」。外界覺得身高令Judy在圈中發展受限制，但性格堅強不服輸的她，對「哈比」二字卻另有見解，認為是吸引工作機會的優勢：「有啲客戶想sell最細部嘅手提電腦，然後就搵咗我！」

 

 

　　現年29歲的鄺潔楹，入行前正職是業務分析師，副業是平面模特兒，嬌小玲瓏的她搞笑說：「當初真係以為係騙案！嗰陣模特兒公司老闆同我講『我覺得你有潛質，個樣又幾甜，啲客會鍾意你呢類型』，因為係影平面廣告相，只會見到個頭，就唔覺得我咁矮，咁我又覺得無傷害，仲可以賺多份外快！」嘗過幕前工作，後來Judy有機會與無綫娛樂新聞台監製見面，對方要求她先練好廣東話、咬字、望鏡頭技巧等，她決定捨棄沉悶正職，轉行做主播，待時機成熟便獲調派主持J2旅遊節目《3日2夜》。

 

Judy拍攝《愛．回家》時，與身高逾六呎的袁文傑展現「最萌身高差」。（網上截圖）

 

渴望扮小鳥依人

 

Judy主持《3日2夜》表現出眾，因而獲安排拍劇。（IG圖片）

 

　　Judy在《3日2夜》及《學是學非》表現突出而受注目，更因細粒身形獲網民封為「哈比女神」。Judy坦言覺得「哈比」兩字有點貶義，但沒有感到不快，因為自己的確個子小小，從另一角度看，工作上或許有優勢：「其實會帶畀我一啲工作機會，同埋有啲韓劇係sell女主角細細粒，男主角好高大，女主角發生啲乜嘢事，男主角一嘢就攬住佢！呢啲情景好sweet，我都好希望拍愛情劇，可以做被保護嘅女主角。不過拍攝嘅時候，我都唔好意思成日要男拍檔擘開大髀遷就我，因為都好攰嘅！」

 

學習劍擊勁好勝

 

為演好《七公主》中的業餘劍擊運動員角色，Judy非常努力練習重劍。

 

　　在下周結局篇的《七公主》中，Judy飾演見習事務律師方楚瑜，亦是業餘劍擊運動員。她在拍攝前一度懷疑自己能否勝任角色，「監製陳維冠問咗教練嘅專業意見，手短腳短嘅人玩劍擊唔一定輸蝕，好似東京奧運男子重劍金牌得主都係比銀牌得主細粒。」在劇中玩重劍的她，起初學劍十分困難，「劍擊教練教我一啲好難嘅動作，係世界冠軍先做到，當時我眼都凸埋！我學咗四個幾月，要做世界冠軍嘅動作，無可能㗎喎！後來剩番一星期時間，教練話不如同監製講搵定替身，我有啲唔忿氣，因為覺得好唔型囉！可能我有少少好勝，最後強迫自己，好似運動員『無嘢係唔得嘅』嗰種精神，死練爛練，試過開廠拍通宵，收工後瞓兩、三個鐘就起身去練劍，最後我真係做到所有動作！」但她不打算繼續學劍，「因為會令到大腿好粗，我個人比較細粒，想身形修長啲呀。」

 

Judy在美國讀書時是肥妹仔一名，跟現在的甜美外表不太一樣。（網上截圖）

 

　　Judy不服輸的精神，早在美國讀書時已經表現出來，09年她在路易斯安那州讀高中時，寄宿在一個黑人家庭裏，「嗰年我經歷嘅嘢，好多人都經歷唔到，例如我參加田徑隊，我要同黑人鬥跑步，依家諗番都唔知點解咁有勇氣去報田徑隊，始終黑人嘅運動基因比亞洲人好！我記得跑3,600米長跑，跑第一嗰位快到可以陪我跑多兩個圈，喺側邊幫我打氣都仲得！」

 

外表甜美的Judy，暗藏男仔頭性格。（IG圖片）

 

謊稱Uncle係成龍

 

Judy留學時怕被欺負，於是講大話騙同學，自稱跟成龍有親。（網上截圖）

 

　　由於Judy是當時學校裏唯一的亞洲人，因害怕自己被欺負，決定講一個無傷大雅的大話。「唔知邊度嚟嘅靈感，為咗保護自己，我跟同學講我uncle係Jackie Chan（成龍），因為除咗Bruce Lee（李小龍），佢哋覺得成龍好打得又好受歡迎，連我都變得好受歡迎！」她至今仍有跟高中同學聯絡：「佢哋仲問我幾時寄成龍簽名相畀佢哋，原來佢哋仲信我uncle係成龍！同學睇我FB知我做咗藝人，就問係咪uncle帶我入行，原來呢個謊言係唔停得，希望有日遇到成龍大哥，我會問佢攞簽名相，始終呃咗人哋咁多年都有少少唔好意思。」

 

轉載自: 晴報

• 

【你點睇？】財政預算案展開公眾諮詢，學者倡問責官員減薪並削減公務員編制，你是否認同？ ► 立即投票