你不找政治，政治也會找上你

　　香港羽毛球一哥伍家朗嘅「黑衣」風波，喺周末燒到非常旺盛，熱力由香港傳到去東京。而牽起火頭嘅民建聯成員、教聯會副主席、本身亦係一名教師嘅穆家駿，喺全港市民齊聲「譴責」要求道歉還伍家朗一個公道之下，最終未有道歉，直接關掉Facebook諗住撲火。但火已起，真係咁就可以撲熄？

（伍家朗IG）

　　成件事穆先生諗住捉到「本地運動員」政治不正確而大造文章，諗住以政治作為武器，為自己增加政治本錢，結果卻顯示出自己無知、令到自己嘅黨捲入政治旋渦之中，就好應該要接受返政治後果。事發後穆先生回應，只係將責任歸咎去羽毛球總會身上，自己無的放矢、唔問清楚就發炮嘅責任撇得一乾二淨咁，絲毫歉意都無，仲要講到家朗要有好成績先對得住洋紫荊旗，絕對係「火上加油」。

　　好彩嘅係依家係暑假，否則隨時有網民去穆先生任教的學校門外請願要求道歉，個人嘅行為唔單止對黨帶來傷害，更可能連累埋學校同學生承受不必要嘅政治壓力。依家關掉自己嘅Facebook，只不過係鴕鳥做法。Tina奉勸一句穆老師，為向全港學生豎立一個勇於認錯嘅好榜樣同埋為黨為校止血，都係正正式式向伍家朗道歉。

　　如果成件事換咗喺上一屆奧運發生，就算穆老師再次發文質疑黑波衫，最多只係話點解會無區徽，輿論亦一定會先行向所屬體育總會問責、係唔係港府虧待香港運動員等等，絕不會牽扯到政治之上。

　　社會上唔會得一位穆先生，「球衣風波」顯示社會上有一批等待增加政治本錢嘅人，專門喺雞蛋裏挑骨頭，政府唔想市民講咁多政治嘢，佢地偏偏就去挑起政治紛爭，未來一段長時間之下，香港人嘅自求多福模式應該係：「唔想自找麻煩，就請自我審查」。唔單止係做創作、寫文章嘅人要自我審得比清水更清，就連普通人、特別係公眾人物，佢地日常做嘅一件好普通嘅一件事，無諗清楚就做的話，都會畀人上綱上線，將港人無辜咁捲入政治旋渦。

　　黑色黃色當然成為最明顯嘅避諱，買衫要識得避之外，衫上面任何一個符號、影相時一個無心嘅手勢、單起右眼拍嘅廣告、參加歌唱比賽揀嘅一首歌，都可能會招惹「政治」殺埋身。

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

【你點睇？】有學者倡60至65歲以下長者之2元乘車優惠，設每月補貼上限700元，你點睇？► 立即投票