民主黨末路

　　今日(10日)係政壇一個里程碑，事關係第一次要求上任中嘅區議員宣誓，同時間亦要睇下，一班泛民區議員宣誓完之後，會唔會因為跌入負面清單而被政府DQ同追薪酬。今日呢個里程碑，亦可能決定，泛民現時最大政黨民主黨，係唔係會走入末路。

　　好似林鄭所講，作為一個政黨，最大嘅價值就係參政。的而且確，如果一個政黨唔參政，咁不如就好似其他個別泛民政黨一樣，宣布解散個組織就算；不過民主黨真係面對嘅最大問題，係參政唔參政，兩條路都係通向崖邊。

　　民主黨現時要計嘅數，係重回溫和泛民路線，究竟可以爭取到幾大嘅政治空間。嚟緊新一屆立法會選舉，得返20個直選議席，分10區各區兩席，按之前泛民建制六四比，泛民最多都係分到10席，更何況來屆立法會選舉仲可唔可以「呼喚」泛民支持者繼續出嚟投票畀泛民，仍然係未知之數，就咁估計，泛民真係齊腳出選的話，20席搶到8席已經係非常好嘅成績。

(資料圖片)

　　有民主黨中人同Tina透露，民主黨內唔少後生嘅，特別仲係孭有區議員身份嘅，到依家都係希望出選立法會，因為揀得從政之路，特別係泛民中人，選立法會議員已經係從政旅程嘅「頂端」，因為獲委任做官嘅機會近乎零。後生黨員依附得喺民主黨呢類大黨，當然係貪佢資源較多、名氣較大，但如果最終選立法會唔畀用「白鴿」標誌去出選的話，無咗「民主黨大戰民建聯」呢類對戰嘅號召，大家都覺得勝算再低幾成。

　　擺明車馬唔畀黨員參選以維護政治倫理、維護仍被扣押黨友嘅尊嚴，面對嘅風險亦都唔細。要好似建制派所講咁，唔派人參選就用到國安法入罪，當然有少少令人摸不著頭腦，但往後嘅其他選舉，資格審查委員會會唔會用返民主黨呢個決定去做判斷落唔落閘，咁就真係無人答到你，因為資審委任何決定，基本上都係密不透風，街外人無從得知。

　　兩邊都係崖邊，所以民主黨內有個講法，最大可能就係容許黨員自己決定選唔選，選的話可以Claim自己係民主黨黨員，但就唔可以落標誌，似乎呢個都係避免「滅黨」嘅最佳方法。但都係嗰句，投票氣氛會有幾旺盛、仲有幾多泛民支持者仲有心行去個票站投票？呢個根本就唔係民主黨嘅末路，而係傳統泛民嘅末路，新政制之下，政黨都可能要換新徽。

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

《說說心理話》心理急救II：幾個徵兆辨認身邊人需要心理支援！點樣對情緒進行急救、自我照顧？專家分享穩定情緒小練習► 即睇