林鄭連任籌碼大幅增加

　　今個星期三（6日）特首林鄭月娥公布咗佢任內嘅最後一份施政報告，呢份被立法會議員容海欣形容為「有血有肉」嘅施政報告，民間嘅聲音出乎意料地係無乜聲音，大家似乎對施政報告「無感」；但係份報告喺政壇入面，震撼感原來都幾大下。 

（Tim攝）

　　施政報告公布之前大家都估到，重中之重必定係房屋政策，而房策必然就係要諗計增加供應量，解決供求失衡呢個老問題。屋唔係麵包，唔可以一下就焗出來，新一份施政報告就掟出「北部都會區」呢個超級規劃，喺連成個規劃用幾多錢林鄭都未講得出嘅情況之下，斷估都知，呢個項目講緊係最少10幾20年後先見到趨形，普羅大眾對報告「無感」，正常不過。

　　不過政壇對於呢份施政報告就真係罕有咁讚到天上有地下無，除咗容海欣「有血有肉」呢個形容詞殺到林鄭回應時有啲措手不及之外，連向來挑剔嘅「姐姐」葉劉淑儀同出口向來唔留餘地嘅謝偉俊，都狂讚呢份係相當高水平同高質量嘅施政報告，其他政黨都係一片讚揚。

（Oscar攝）

　　Tina同幾位不同黨派嘅議員八卦過，問佢地讚林鄭讚到咁「露骨」，係真心真意定係西環旨意？佢地不約而同都話大家都覺得呢份施政報告有願景，特別係北部都會區規劃，將香港同深圳某程度上配合做整體規劃，唔再係好似以前咁各自各，所以佢地都係由衷咁讚賞呢份施政報告。但西環其實有無落柯打要極力為施政報告護航？據講阿爺早已高度認同北部都會區大計，並早已打招呼要全力支持，不過被問到嘅幾位建制議員都強調「唔講都會讚」。

　　無論如何，林鄭呢份特首施政報告，喺建制派口中評分之高真係五年最強，再加上報告入面最耀眼嘅部分北部都會區，無十年八年都睇唔到有乜野成績嘅廣宏遠景，仲未計改組政府嘅計劃。從施政報告公布之後嘅紅媒吹捧、建制高評，呢份施政報告的確為林鄭連任，喺阿爺面前增加唔少籌碼，再加上涉及咁長遠而又配合到國家整體發展策略的話，的確好大可能要佢全力以赴將各項遠景上馬落實。林鄭對香港未來發展嘅鴻圖大計，正正係佢爭取連任嘅大計。

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

【你點睇】陳美寶、羅淑佩分別被任命為運物局及文體旅局局長，你是否認同新任命有助香港鞏固物流樞紐地位及促進旅遊經濟？► 立即投票