《經濟不停學》元宇宙炒緊乜？咪啫係VR同AR囉！

 　　唔知大家有冇想象過進入一個虛擬世界，而呢個世界係好寫實咁出現喺眼前，唔同民族嘅人可以一齊交流，玩遊戲，不限於文字或聲音。近呢幾個月，Ａ股就出現咗一個熱炒概念叫元宇宙，多數係炒下軟件、視訊股咁，原來連Facebook都有玩埋一份，一齊嚟睇下呢個宇宙到底係咩嚟啦。

 

　　元宇宙（Metaverse)一詞由前綴「meta」(意思係超越)同詞幹「verse」(通過逆向構詞法由「宇宙（universe）」得來)組成。出自美國作家Neal Stephenson喺1992年出版嘅科幻小說《雪崩》，元宇宙係一個虛擬時空間嘅集合，由一系列嘅AR、VR同互聯網所組成。係一個以虛擬形像喺三維空間入邊同各種軟件交互嘅世界。

 

科幻小說雪崩。（wiki圖片）

 

元宇宙同現實世界同時存在，具備社交功能

 

　　喺本書入邊係咁形容嘅：「鏡頭下方的電腦內部有三束激光——分為紅、綠、藍三色。這三種顏色的光能夠以不同強度組合在一起，製造出阿弘（故事主角）能看到的任何顏色。

 

　　這樣一來，電腦內部就能發出一道細細的光束，可以是任何顏色，通過上方的廣角魚眼鏡頭射到任何方向。電腦中的電子鏡面讓這束光在阿弘的目鏡上來回掃描。由此形成的圖像就懸在阿弘的雙眼和他所看到的現實世界之間。只要在人的兩隻眼睛前方各自繪出一幅稍有不同的圖像，就能營造出三維效果。當這幅三維動態圖像以二千乘二千的像素分辨率呈現出來時，它已經如同肉眼所能識別的任何畫面一樣清晰。而一旦小小的耳機中傳出立體聲數字音響，一連串活動的三維畫面就擁有了完美的逼真配音。

 

　　阿弘並非真正身處此地。實際上，他在一個由電腦生成的世界裡。這個虛構的空間叫作「元宇宙」。而境色只是由一些軟件構成，通過遍及全球的光纖網絡供大眾使用。」

 

　　喺書入邊，人進入元宇宙嘅目的多數係消閒。人嘅化身可以交談、可以起樓，會有自己獨特嘅文化同不明文共識。同現實世界一樣，窮有窮玩，有錢佬有自己嘅玩法，例如用高級啲嘅軟件執靚啲自己個樣。

 

　　另外，大導演史提芬史匹堡２０１８年嘅電影「挑戰者１號」乃至20年前嘅「駭客帝國」故事發生嘅背景都可以視作元宇宙。

 

Roblox畀人發揮創意，製作遊戲可變現

 

Roblox３月中在紐交所上市，以直接上市方式登陸資本市場，按參考價每股45美元及6.52億股流通股份計，市值近300億美元。（shutterstock圖片）

 

　　現實生活中都有唔少公司研究緊元宇宙開發。今年３月上旬喺美國就有一隻叫Roblox嘅公司上市，佢係一個結合遊戲同社交媒體嘅平台。呢間公司唔會開發遊戲，而係為人提供工具和平台來製作他們自己嘅作品。然後玩家們上平台遊玩，並且與其他玩家建立基於平台的社交關係。例如透過《AdoptMe》扮家長同細路，選擇收養或係被收養；透過《Work at a Pizza Place》扮食pizza同開pizza鋪。

 

　　呢個平台開放了分成，創作者可以自己自行定價，設計商業模式，對於作品有好大自由度。開發者可以為各種物品同遊戲體驗收取虛擬貨幣 Robux，佢哋亦可以將賺到嘅Robux換成真美金。當然亦可以使真錢買Robux。

 

Facebook主打VR多功能，返工消閒乜都得

 

　　Facebook喺2014年收購虛擬實境科技公司Oculus，依家有推出 VR 頭戴裝置同AR 眼鏡。其中VR頭戴裝置除咗可以用嚟打機、仲可以睇戲、開會、同friend搞虛擬派對。Facebook喺產品嘅社交方面下咗唔少功夫，系統接入Messenger，用可以直接同Facebook friends溝通，亦可以用Messenger直接向朋友發送VR游戲邀請。另外，用戶可以喺VR入邊收到iPhone嘅通知，唔會怕miss電話同messages，亦可以通過藍牙連接無線滑鼠同鍵盤嘅功能方法做嘢。希望用5年時間，將Facebook打造成一間元宇宙公司。

 

　　暫時嚟睇，元宇宙之爭就好似Adroid同ios嘅競賽咁，各間公司要鬥發展得快，覆蓋到生活嘅層面愈多愈好，先至搶到市場佔有率。當然到最後寡佔（oligopoly）嘅機會率係好有可能高過壟斷（monopoly），邊有可能咁易「宇宙大同」呀！

 

撰文：吳藹林

 

 

 

 

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

想要獨家投資理財Tips？即Like etnet 全新Facebook專頁► 立即讚好