夏天又到啦！相信姐妹們上季買落好多衫，有啲甚至著都未著過，唔通拎去堆填區？咁又唔使，今集《Make money》同你總結下，二手市場其實都有價有市，仲有好多你估唔到嘅嘢放上網都會有人收！

 

1. 二手衫有價有市，賺得一百幾十都係錢！　

 

　　二手市場消費其實唔算咩新潮流，特別呢幾年香港出咗幾個二手網上交易平台，用手機就可以影張相就可以Upload然後開賣，真係快過打針啊！

 

（Shutterstock圖片）

　　點解二手衫都會有市場？咁你就唔明新一代諗法啦！其實有分析指出，我哋z世代（20至30歲）喺富裕環境長大，除咗計算「金錢成本」，仲會思考「環境」同「社會成本」，擔心「快時裝」（Fast Fashion）對環境破壞，而且我哋呢一代人根本唔介意二手嘢，如果搵到一兩件「古董嘢」，識得配搭就變潮流，正所謂「古老當時興」咪就係咁解！

 

2. 唔玩嘅遊戲Game八折仍有人收！中古Game當係寶！

　　近期一隻「動森」令到全世界「一機難求」，其實而家Switch嘅遊戲卡，八折放出去依然有人會收，因為遊戲卡點計都平過買虛擬版，所以如果玩到悶唔想玩，可以拎上平台八折出售，大把人搶啊！

 

（Shutterstock圖片）

 

　　另外，近期流行一股「中古Game」潮流，當年嘅小朋友都變晒大朋友，所以大朋友們都會想收部玩到嘅中古遊戲機，如果你部舊機放喺屋企唔玩，不如拎出嚟成就他人夢想啦！

　
3. 想換家私電器？不如將舊嘅賣出再補錢買新嘢！
　　

　　有時候發現屋企舊家私、舊電器都運作良好，但見到有新款嘢「心心眼」，其實可以試下將屋企原有嘅拎上網賣，但必須註明「買家自取」，費事蝕運費啦！

 

 （Shutterstock圖片）

 

　　傢俬方面，例如梳化、實木櫃、餐台等，二手網都賣緊200至800蚊左右（視乎折舊程度）；電器就包羅萬有，電視機、洗衣機、無葉風扇、舊電腦都有人會收，不過運作良好先賣到好價錢！拎咗舊錢再買新款嘢，變相新歡有折頭！

　
4. 陳年「潮物」仍很潮，Yes卡定「他媽哥池」齊考古！
　

　　不論「四大天王」定係「寶麗金七小花」，相信都係香港人嘅集體回憶。如果你細個儲埋好多偶像嘅Yes卡，今日就可能係寶啦！例如好似「一代女神」周慧敏嘅親筆簽名卡，平均收緊200至500蚊一張，如果係閃、凸體仲可以收高啲價錢！

 

 

 （Shutterstock圖片）

 

　　另外，一代潮物「他媽哥池」，當年香港炒到千幾二千蚊一部，假如係當年嘅日本貨，而家仍可賣400蚊一隻。反正當年嘅潮物，而家都變成考古學，你肯放就絕對有人肯收，好過放落垃圾桶啊！

 

 （Shutterstock圖片）

 

　　外國人成日都講話：「one man's trash is another man's treasure」，你覺得係垃圾，但人地覺得係寶呢！垃圾變寶又環保，真係Win Win Win呀！所以開始整理下屋企籠底，話唔得會新發現呢？

 

撰文：李皆穎

 

 

【etnet一App通天下】獨家「銀行匯率比較」功能：匯市靚價一眼通，一按直達交易商，買入賣出好輕鬆！

 

立即下載>>

etnet財經﹒生活App 

iOS : https://apple.co/2PCaN4b 

Android: http://bit.ly/38h135T

 

etnet MQ強化版App 

iOS : https://apple.co/2VEjoHl 

Android: http://bit.ly/32RGk7G