《小傳日記》記得去年今日ＡＩ熱潮一觸即發，ＣｈａｔＧＰＴ引起科技巨頭警覺發展ＡＩ刻不容緩，如果唔係就不進則退。商湯（０００２０）被譽為百度（０９８８８）ＡＩ路上最大對手，但過去呢年呢兩大對手都雙雙跌落神壇。　　　過去呢年其實商湯過得一啲都唔容易，前年底突發傳出商湯創辦人湯曉鷗猝逝，網上一直謠傳死因不明，掀起無盡猜想。但唔理死因係咩，商湯喺ＡＩ大戰伊始就失去領頭羊，公司群龍無首，好明顯見到過去呢年嘅商湯真係作為不大。一間公司管理上行下效，管理層作風係點就自然令到成間公司會出現點嘅步伐。　　　事已至此唔係要追究商湯呢一年來點樣不作為，明顯公司都係處於適應期，適應無咗創辦人嘅「殤湯時代」，由管理到開發都要經歷一次砍掉重練，造成過去一年來股價表現咁令人失望。上年出現咗商湯上市兩年幾以來第一次配股，半年左右之後喺上個月中再配多一次，兩次合共籌咗４８億銀，而第二次配股時講明，第一次籌嘅廿億經已使曬。　　　商湯近期嘅動作都好有破釜沉舟嘅感覺，公司上月初宣布完成戰略架構重組，未來將會主力發展生成式ＡＩ，希望可以推動公司業務增長以及財務穩健性。方向清晰講明要保本兼增長，除咗兩次配股籌旗，最新《彭博》報道話商湯已經將新加坡總部嘅黃金地段退租，「大屋搬細屋」去平租啲嘅地段，實行各方面「過緊日子」全力輸出投入研發。　　　計劃同目標都相當清晰，孖屐都已經清楚明白公司嘅決心，下一步就要講執行能力。雖然商湯全情投入研發，但你有嘅人哋都有，要點樣提升產品商業化前景係目前最大挑戰。老實講，神州市面上ＡＩＧＣ大模型產品都係大同小異，如果商湯嘅「商量」模型喺內容生成上唔夠優異，又培養唔到屬於自己嘅ＡＩ生態圈，前景真係幾艱難。不過商湯作為昔日「ＡＩ四小龍」，喺ＡＩ人面識別技術上有一定造詣，如果配合埋ＡＩ大模型同工業機械人，就算未有產品面世，炒下概念推高市值都未嘗不可，請請！　＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。

【etnet 30周年】多重慶祝活動一浪接一浪，好禮連環賞！ ► 即睇詳情