今次的主角 Anne，絕對是姊妹群中的開心果，皆因她是烹飪能手，家中派對 Booking 常滿，給親朋戚友帶來無限的口腹之樂。她又經常去餐廳吸收新知識，如對中環這間京川滬菜館很是欣賞，便立即相約好姊妹來吃飯，乘機偷師。

極愛烹飪

　　說Anne 是師奶「廚魔」，實不為過。她 8 歲已跟媽媽出入廚房，做小工、洗碗、切菜、炒飯等閒事。「媽媽本身煮嘢好好食，佢又會出去學完返屋企煮比我哋食。可能興趣就係咁培養出嚟，加上爸爸有段時間又做過廚師，我好細個已經成功整到小籠包。」她回憶說。

　　不過，她自己反而沒有去學烹飪，只是喜歡去圖書館借 Cook Book、睇電視、再加中學的家政課而已。「依家多埋上網囉！我行街就係去睇食物、廚具、廚房電器，屋企放滿各種煮食用具、湯煲、煎鑊，真係放到一屋都係㗎。」

　　在旁的好友 Michelle 對她亦讚賞有加，說她又有藝術細胞，煮一道菜出來，一定會花心思設計，講究賣相，所以，有許多朋友都喜歡找 Anne 做囍宴「派對煮手」。「我亦真係試過幾次幫朋友整結婚派對小食，做得好開心㗎！」

Anne 常受朋友邀約炮製各式派對小吃，這款魚子醬忌廉芝士酥，便是她其中的得意之作。

　　她又喜歡挑戰，過去年半時間內，她在各項食物或家電品牌舉辦的烹飪比賽中，贏得大小獎項 8 個。「起初當然只是旨在參與，但後來玩玩吓，能夠依著大會訂立嘅各種要求，又真係比我完成到兼攞埋獎，好有滿足感。」

時常創新

Anne（右）與兩位好友 Michelle（中）、Lily（左）閒時最喜歡在家煮飯仔之餘，也會周圍食嘢。

　　她自言對烹飪除了有莫大興趣和天份外，肯大膽嘗試也是一個廚藝進步的重要元素。「記得有次係屋企要用麵粉整焗青口，發覺沒有麵粉，便用了芝麻梳打餅整碎代替，結果青口出嚟效果超乎意料咁好，青口面特別脆之外，入口又食到芝麻香。」不過，她也笑言要多出外吃飯才會有新的靈感。「新舊餐廳都會去，因為以前試過霸王山莊，覺得好食。朋友話係中環開咗間新嘅叫霸王風味，就嚟試試，一試就知有水準。所以，特登叫多兩個好朋友嚟食，因為可以再試多啲菜式。」

賣相考究

家鄉涼拌桂花魚（$148）：原條新鮮桂花魚起片，加上京葱、麻油、芫茜等調味料，清鮮爽甜。

重慶口水嘉美雞（$145）：標明用去骨嘉美雞的髀肉，浸在麻辣的口水雞汁，麻香十足。

　　她說要先吃冷盤，如涼拌桂花魚和口水雞。「首先是賣相，完全有我嘅要求，口水雞用竹籤拮住，浸係調味得麻香適中嘅汁醬中，又去埋骨，好入味。另外，以麻油、芫茜和多種調味料撈嘅桂魚片，吃起上嚟爽滑清新，好開胃。」

富貴黃金蝦球（$148）：以原隻大蝦打成蝦膠並搓成球狀，變種版黃金蝦。最體貼是蝦膠內仍有些蝦肉，令到口感不像吃蝦丸般，有諗頭。

　　她和媽媽在大時大節，便一定會炮製黃金蝦，單是炒製那鹹蛋黃，已經費工夫。她估不到這裏的黃金蝦改成球，用原隻大蝦打成蝦膠並搓成球狀，外層鋪滿鹹蛋黃，另類製法，很有創意。

招牌北京烤鴨（$438）：採用 70-80 天大的東北鴨，以天然飼料餵養，肉身不會過肥。一樣可配以甜醬、京葱、青瓜，還可選夾菠蘿、蜜瓜、哈密瓜，鮮果帶來的酸甜味道，驚喜去膩。

　　另一創意是店子的北京烤鴨，除了有傳統的京葱、青瓜作佐料外，還附有菠蘿條、哈密瓜條、蜜瓜條等選擇，是廚師們經過嘗試後得出的結果。因為他們發覺吃烤鴨易膩，改用水果條來夾著鴨肉吃，醒胃得來又另有風味，而且Anne 謂望著師傅片烤鴨時，仍能聽到那脆皮聲，認真厲害！

紅袍辣子爆肉蟹（約 550 克，$438）：菲律賓冰鮮大肉蟹，來到香港要做個 Spa 淨化 3 天，令牠們回復新鮮生猛，難怪肉質仍有彈性，炒得亦辣香。

　　還有那道紅噹噹的紅袍辣子爆肉蟹，起初她以為會好辣，但入口卻只嘗到點點辣香，最開心還是見到那些蟹膏，差不多爆滿全個蟹蓋，而蟹肉仍保持彈性。原來這些由菲律賓來的冰鮮大肉蟹，來到香港要放進一套澳洲養殖海洋生物的過濾系統內，經過 3 天淨化，令牠們回復新鮮生猛。

招牌小籠包（$18／件）：比一般小籠包稍大，但皮薄餡鮮，湯汁也多，做得出色。

椒鹽羊圓蹄（$168）：Anne 知道羊蹄用了 10 多種香料醃 3-4 小時後再炆，再加上椒鹽炸，肉質仍能保持嫩滑，覺得效果不俗。

　　她也試了店子的招牌小籠包，「湯汁多之餘，夾起 fing 兩吓都唔穿皮，好勁啊！」她笑讚道。

其他推介

　　閒時 Anne 會相約朋友來家煮飯仔，每人負責煮幾味，也會經常周圍試菜。「我哋鍾意去萬豪酒店 5 樓的萬豪咖啡室（電話：2810 8366）食自助餐，因為我喜歡食花膠，個度嘅自助餐必有花膠食。仲有又鍾意去 IFC 嘅 Amanda S 開嘅甜品店 Petite Amanda（電話：2234 7222）買甜品，Tiramisu 做得出色，軟滑又香濃，仲有買一個外賣甜品百幾蚊，連埋個 Le Creuset 杯送埋，我地呢班師奶仔最受。」

霸王風味 Info

地址：中環威靈頓街 98 號翡翠中心一樓（閣麟街出口）

電話：2652 6600

營業時間：11:30am - 凌晨 12mn

備註：每天 12nn 起，每位客人可免費試食兩件附配料的烤鴨，送完即止。每晚推出 4 人餐，讓客人以優惠價 $688 試齊紅袍辣子爆肉蟹、招牌北京烤鴨和小籠包。

（撰文：郭秀芳　攝影：湯炳強）

轉載自香港經濟日報