又到星期五，16強於香港時間今早6點出晒爐，好戲即將上演。南美洲球隊比例係最高，六隊入圍只係out咗一隊厄瓜多爾，命中率相當高，地利人和係好有幫助嘅「X factor」，不過其中四隊響埋同一條線，所以巴西、智利、哥倫比亞、烏拉圭只能得一隊入到四強，未至於南美洲壟斷晒，不過全南美決賽仍然係有機會發生嘅，因為阿根廷響另一邊抽到條好籤，16強對瑞士。

16強party，喺巴西嘅我哋已經預備好嘞！

　　16強戲碼，我將會現場睇兩場大戰，一場係等佢好耐，響聖保羅舉行嘅1F對2E，即係阿根廷對瑞士！嘩，恕身為阿根廷支持者嘅我失禮，終於等到今屆第一次現場睇阿根廷嘞，實在太期待！

　　上屆響南非，我現場睇過佢哋兩次，一場係大勝南韓，happy到暈，一場係大敗比德國，傷心到嘔！

　　由於已經試過最high同最low，所以呢我諗我頂得住即將再出現嘅任何刺激啩！美斯你唔好成日嚇人咁遲先入波得唔得？

　　另一場係去福塔雷薩睇嘅1B對2A，即係荷蘭對墨西哥。荷蘭堪稱暫時最有霸氣球隊，又快又辣嘅攻勢，可以好好挑戰下頑強防守嘅墨西哥，諗起都好睇！而呢場波一定要有咁早得咁早去球場，因為兩隊粉絲都係主角，分別係我今屆見識過之最，一隊最多人，人頭之多可以媲美巴西主場氣勢；一隊靚到暈，男男女女都比足心機搞造型同整靚衫，我見一個就想影一個！

　　所以話世界盃呢，除咗球員要備戰，球迷們可能仲早做足準備，salute to球迷們，cheers！

轉載自晴報