防暴警隊已經響門口準備好，好在唔使做嘢住，不過睇嚟之後巴西每場淘汰賽都預定多啲阿sir響現場先得！因為16強就見咗巴西個底，睇嚟都冇乜嘢係「take it for granted」，今次互射12碼唔死得，唔單止係巴西全隊嘅運氣，亦係全國人民嘅運氣，最重要係我哋專程嚟睇波嘅運氣，可以過多幾日安樂日子！

巴西驚喜晉級，我望住各位地膽fans，只能講一句你快樂所以我快樂。

　　睇完波後，上facebook欣賞下各位理智球迷嘅睇法。嘩，除咗小部分巴西die hard fans力撑外，大部分「中立」球迷竟然都係替智利不值，認為佢哋表現遠勝東道主，咁當我打橫瞓響福塔雷薩沙灘上嘅fan fest時，睇見智利守得咁好，然後加時仲有個中楣波唔入，就真係有啲替佢哋唔抵。

　　只不過呢，響我副黑超望出去周圍都係可愛巴西朋友，而佢哋焦急嘅眼神提醒我唔好諗咁多，總之響決賽之前，我都要隨時變身brazilian，因為睇世界杯，主辦國真係唔可以咁早走，你諗下一個死城咁的話，又點會玩得high！

　　之後睇埋哥倫比亞場波，柏卡文練到隊波嘅攻擊力非常立體，長傳短交斬高波畀地波瓣瓣有，型仔占士洛迪古斯又整多兩粒，累積五球暫領先射手榜，搞到大家都有啲睇淡下場嘅巴西。

　　不過我睇法有啲唔同，其實家陣嘅巴西防守比攻力強，對住主攻嘅球隊反而仲啱打。巴西吸收咗呢場標冷汗經驗之後，下場晉級應該冇今場咁難度高，不過防暴警察，照舊stand by啦！

轉載自晴報