全球太空競賽由官營鬥到民營，而專門做飛機航運嘅維珍公司都已經轉做太空飛行事業，最近維珍創辦人布蘭森乘坐自己公司旗下嘅太空船衝上太空之際，但反而公司股價急劇插水，究竟係咩因由呢？

（Shutterstock圖片）

跑贏馬斯克及貝索斯，鬥快上太空

（Shutterstock圖片）

　　三大富豪包括馬斯克、貝索斯及布蘭森近期成日都做封面人物，皆因佢地三個旗下都有自己嘅太空船研發公司，新一代太空競賽其實已經展開好幾年，而布蘭森係7月11日乘坐自己公司旗下嘅「團結號」太空船飛上太空！比起貝索斯嘅「飛天」計劃足足早9日。

　呢隻太空船係美國新墨西哥州升空，一共搭載六人，包括兩名駕駛員Dave同Michael、布蘭森、宇航員Beth、工程師Colin及政府事務副總裁Sirisha。布蘭森表示，自己小時候就想登陸太空，估唔到而家夢想成真，更鼓勵其他人：

　　「致下一代夢想家們：如果我地都做到呢一點，咁請你地想像下可以做到幾多？」

20萬美金一張飛，你又會唔會坐？

（Shutterstock圖片）

　　消息指，維珍銀河嘅太空之旅已經好多人預約，目前有600張門票已經被預訂，每張售價約20至25萬之間（約156萬港元至195萬港元），大拿拿百幾萬港紙上一轉太空，值唔值得就見仁見智啦！不過肯定嘅係，太空旅行嘅大門即將開啟，大行瑞銀就預計，去到2030年太空旅行每年將產生近40億美元嘅收入。

　　而貝索斯旗下嘅「藍色起源」都籌備緊太空旅行計劃，雖然貝索斯聲稱自己嘅太空船比起維珍銀河飛得更高，不過有外國媒體就表示，兩間公司其實都未有飛夠高度及最高速度地進入地球軌道，似乎係僅僅飛上太空，等乘客感受下無重力嘅漂浮感，同時享受從太空觀望地球嘅景色。

維珍銀河股價勁插水，配售股份出事

（Shutterstock圖片）

　　不過，上完太空之後，維珍銀河股價急插17.3%，收報係40.69美元。公司公布，已經同瑞信、大摩及高盛簽訂協議，將配售5億美元嘅股份。而籌得款項將用於一般企業用途，包括用於製造能力、發展飛船艦隊和其他基礎設施改進的資本支出。市場解讀，會唔會係公司因為研發太空旅行已經將資金燒得七七八八，雖然有600張門票已經預定，但一日未收晒款一日都有風險。

　　另一方面睇，維珍銀河今年以來已經累積升幅達七成，公司配售股份都係為股價「降溫」，而瑞銀分析師Myles Walton將維珍銀河評級由「買入」下調至「中性」。佢認為以維珍銀河目前的股價水平來看，大量利好因素已經被消化。無論點都好，布蘭森以前嘅「空姐制服誘惑」形象將會被改寫，第日要身穿太空服幫公司賣廣告啦！

撰文：李皆穎