出年二月之前，拜登就要決定畀唔畀鮑威爾連任美國聯儲局主席，雖則「孖屐」大部份人都覺得鮑威爾可以成功連任，但始終要搵個人同佢競爭下，場賽事先好睇，而今次嘅熱門侯選人，就叫Lael Brainard，佢同拜登一樣係民主黨人，喺聯儲局理事會都做咗7年，算係飽威爾嘅同事。

Lael Brainard底子厚，任期橫誇四任總統

　　Lael Brainard服務咗美國政府好多年，時長橫跨四任總統。佢喺哈佛大學獲得經濟學碩士同博士學位，1997年加入克林頓政府做經濟顧問，期內擔任亞太經合組織會議嘅白宮協調員、為中國加入世貿組織做準備等。

　　2009年奧巴馬提名佢做財政部副部長負責國際事務，職責包括應對歐元區危機同與中國嘅貨幣關係，佢任內向中國施壓，令人民幣匯率更自由浮動，而唔係大幅低水。2014年6月開始任職美聯儲理事會成員，擔任行政行長及四個委員會嘅主席，分別係金融穩定部、美聯準系統理事會、消費者與社區事務部、儲備銀行運營同支付系統部。

Lael Brainard：美國要加快推央行數位貨幣

中國近年大力加快人民幣數碼化進程，似乎令Lael Brainard感到威脅。（shutterstock圖片）

　　唔知係咪因為之前接觸得中國事務多，對中國嘅貨幣政策都有啲睇法。佢近排話，美國有開發央行數位貨幣（CDBC）嘅迫切性。因為美元喺國際支付中佔主導地位：

　　「如果全球其他主要司法管轄區，例如中國都有數位貨幣，而美國冇，我會覺得好難理解。而穩定幣可能會令到支付系統嘅使用變得碎片化。」

　　而Brainard同鮑威爾就貨幣政策方面觀點一致，認為需要睇到就業市場有更明顯改善後先開始縮減債券購買規模。佢會更傾向用監管工具嚟防止資產泡沫之類嘅金融風險。

正值敏感時刻，儲局高層換馬風險大

　　按照過往慣例，白宮預計會喺今年秋季決定，係咪會畀鮑威爾連任主席，或者提名新嘅候選人。至於鮑威爾冇好明確咁表明連任意願，不過美國財政部長耶倫就公開讚過，話佢任內嘅表現令人滿意，似乎贏個馬鼻咁喎。

　　據講，政府人員係滿意鮑威爾應對疫情復甦嘅行動，喺拜登推財政計劃嗰時都企喺拜登嗰邊，仲滿意佢對通脹嘅管控喎。

　　另一方面，依家正值通脹率飆升、收水決定嘅敏感時刻。如果喺呢個時侯要準備重大高層換馬，下一任主席人選嘅不確定性會變為政策不確定性，進而引發市場不確定性。

撰文：吳藹林