呢兩年「星球大戰」打得如火如荼，兩位「世一」嘅霸主馬斯克同貝索斯，大家日日都爭住上太空，又要鬥下邊個升得高啲，又要串下對方咁，真係太空界嘅「渝亮」啦！不過，佢地目前唔鬥上太空住，而係鬥打官司！有報道指貝索斯旗下公司瘋狂控告馬斯克旗下嘅Space X，平均每16日就告一次，究竟有啲咩事要告得咁密呢？

（Shutterstock圖片）

兩位首富先鬥身家，再鬥到上太空

（Shutterstock圖片）

　　其實兩位富豪都已經有過千億美元身家，據福布斯數據顯示，貝索斯目前身家大概係2001億美元，而馬斯克大約係1907億美元，但由於股價經常浮動，所以兩人係「首富」頭銜上經常換位。

　　事實上，兩人概「本業」其實已經相當穩定，亞馬遜已經係電商巨頭，而特斯拉又係電動車概著名牌子。但兩人都選擇開發同一個藍海－太空，早前貝索斯旗下概藍色起源以及特斯拉旗下概Space X都開展商業太空旅行事業，仲已經完成試飛，已經進入賣飛程序，不過雙方都好似睇大家唔順眼咁款。

貝索斯日告夜告Space X，希望想打殘對方？

（Shutterstock圖片）

　　大家兩間太空公司除咗開發太空旅遊事業之外，仲想係國家登月計劃上分一杯羹，而美國航天局（NASA）早前耗資860億美元嘅登月計劃上，就選擇同Space X合作，貝索斯嬲嬲地，就一口氣連NASA、Space X一齊告上法庭，抗議NASA向馬斯克提供29億美元合約。

　　跟住亞馬遜子公司再向聯邦通訊委員（FCC）會投訴Space X，並敦促FCC拒絕SpaceX的第二代星鏈（Starlink）修正案，理由係Space X嘅修正案有兩種不同部署方案，而係高度、傾斜度、甚至衛星總數等每一個主要細節上都未有完全解決技術設計，違反了FCC對相關申請需要具備「完整性且沒有內部不一致細節」嘅規則。

　　馬斯克統計過，貝索斯幾乎每16日就告自己一次，仲串佢話：「自從佢退休之後，就變成投訴控告專業戶，日日就係到告Space X。」

第二個戰場：衛星互聯網

（Shutterstock圖片）

　　正所謂「一街都係飛機，一地都係手提電話」，雖然飛機大家就搭唔到啦暫時，不過網就要繼續照上，而家開始流行將「衛星電話」平民化，所以唔少公司都開始透過建立衛星系統提供服務，好似Space X咁，已經有一個計劃名為「星鏈」，目前已經獲許可射近1.2萬個衛星之外，未來尋求目標係3萬個！

　　而貝索斯都有個「柯伊伯項目」，不過目前佢就未開始生產衛星，公司表示可能要到2023年先開始發射。有分析認為，點解貝索斯日告夜告，就係想用法律手段拉慢SpaceX嘅研究速度，希望可以令兩者差距收窄，而市場估計2025年全球衛星互聯網產值將會高達5600億至8500億美元。唔怪得大家日鬥夜鬥啦！

撰文:李皆穎