過去一個禮拜連登財經討論區真係熱鬧，大家都唔再討論邊隻股，而係講緊「大細狗之戰」，過去半個月「細狗」柴犬幣（Shib）由低位計已經累積逾8倍升幅，市值已經跑贏「大狗」狗狗幣（Doge）；而且市場消息更指美國券商Robinhood就會係美國東岸時間11月1日早上公布將會上市柴犬幣，新一輪幣戰一觸即發！

斯諾登叫大家唔好買細狗，但曾讚好比特幣

　　曾經流亡海外嘅愛德華斯諾登都有留意開加密貨幣市場，佢建議大家唔應該將自己啲血汗錢投資落一個「狗幣複製品」身上，雖然佢話「唔介意人買垃圾」，但擔心購買者會被操控；不過斯諾登測讚好比特幣，仲揚言話後join虛擬市場嘅人會後悔當初嘅猶豫不決！

　　而另一狗幣代言人Elon Musk又係推特上唱好狗幣，並表示佢會係美國德州興建一所大學，而該學費將會由狗狗幣支付，如果有養狗嘅人仲可以享受折扣！呢個消息一出，狗狗幣價格輕微反彈，但之後又回落返，可能大家都習慣Elon Musk「車大砲」嘅言論，到佢真係起學校先可能落力炒！

柴狗幣消息滿天飛，傳Tesla接受柴狗幣交易且將會於Robinhood上市

　　今日市場消息真係滿天飛，先講第一個消息，有位自稱係CPA嘅Joe Reed係推特上表示，自己同美資券商Robinhood內部人士交談，得知該券行將會係美國東岸時間11月1日上午公布柴犬幣將會係該交易所上市。呢個消息真定假應該今晚好快知到，大家點解咁憧憬上呢間交易所呢？因為當時狗狗幣係呢間交易所上市之後幣價立即飆升，柴犬幣持有人都希望Shib上市之後都可以複製呢個升幅。

　　另一個消息，就係有網友發現，係Tesla官方網站嘅coding上面顯示，出現有關於比特幣及柴犬幣嘅付款方式指令，唔通意味係可見未來Tesla會接受呢兩隻幣嘅付款方式？不過，有網友質疑，Elon Musk一路都支持開狗狗幣，又點會突然接納柴犬幣做支付方式呢？可能係消息誤傳都唔出奇呢。

一堆山寨幣，你又敢唔敢買？

　　有唔少人都認為加密貨幣泡沫已現，因為有一堆不知名「山寨幣」湧出，大家都想希望複製柴犬幣暴漲模式，所以衍生一系列「狗類山寨幣」，最近又有一個新幣叫「Dogelon Mars」（Elon），呢個幣係以狗幣、Elon Musk及火星三者結合而命名，並表示呢個係一個不斷發展嘅項目。

　　自呢個幣係10月29日被OKEx和Crypto.com上市之後，兩日內已經升超過兩倍，唔知你又會唔會唔入手呢？不過都係個句，要做好功課同埋考慮風險啊！