近期大家都關注緊美國幾時開始加息，皆因高通脹問題令唔少分析師擔心，如果仲唔加大力度的話，美國經濟將會陷入萬劫不復嘅情況；而各大行都開始分析明年美國聯儲局嘅去向，究竟加息對美股會唔會有重大影響呢？有分析更指高通脹會令美國經濟陷入衰退局面，真係嚇死人啦！

安聯首席經濟顧問 Mohamed El-Erian：鮑威爾嘅「暫時論」失誤可能性很高

　　安聯首席經濟顧問 Mohamed El-Erian接受訪問時表示，鮑威爾嘅「通脹暫時論」可能係聯儲局史上最差嘅通脹預測，皆因失誤嘅可能幸好高，所以聯儲局應該加快腳步制止通脹，其中包括通過Taper、減少支持房地產等動作「煞停通脹」，如果聯儲局仲唔做野得話，將會令美國經濟陷入衰退風險之中。

　　其他大行方面，高盛早前預計將會提早加息，預計明年三月完成Taper、然後六、九、十二月各加息一次；瑞銀都預計未來一年將會加息及加速Taper；連一路「唱反調」嘅大摩都開始改口，預計加息將會提早半年至出年9月開始。

沽空美股有無得做？分析師：美股最少承受到兩次加息

（shutterstock圖片）

　　咁加息之後，美股神話係咪已經不再呢？咁開年開始做沽空咪贏硬？美國國民證券（National Securities）首席市場策略師Art Hogan就同大家講，大家其實想多左啦，好多人都誇大疫情對經濟影響，事實上2021年低買高賣已經贏唔少，今年班「空軍」都輸唔少，所以唔好打算再沽空啦！

　　而唔少市場專家及分析師都認為，美國高通脹的情況下，美股最少可以承受兩次加息，雖然上個禮拜公布美國十一月份CPI數據都錄得新高，但市場買加未見有太大嘅悲觀情況；事實上，係芝加哥期權交所數據顯示，沽空期權數據一路都回落緊，因為大家都怕買漏一啲暴升股，所以資金目前正在消化加息相關嘅消息。

美銀：建議投資者離場，逢高出貨

（shutterstock圖片）

　　至於大行美銀睇法就比較悲觀，該行分析師Michael Hartnett係最新發表嘅報告入面提到，過去一個星期美股反彈其實係一個「逃生門」，建議投資者逢高位出貨，而唔係逢低買入，因為利率上升必然衝擊華爾街，而且情況同二千年科網泡沫比起，呢一輪嘅科技股跌幅將會相當驚人。

　　Hartnett更強調，投機泡沫已經破裂，好似「連登契媽」旗下隻基金已經持續崩潰，同2000年科網泡沫時候，與景順基金情況接近，並指出近期反彈都唔使太興奮，因為都係「死貓彈」，至於美銀係咪得正確，就真係等下年先可以揭盅啦！

撰文：李皆穎