上星期講到中國出產嘅HR高層，一登位就整咗「十戒」出嚟管治我地呢班奴隸。唔畀喺位食嘢、唔畀擺設座位都係閒事，最變態係有關生理需要及個人健康問題，佢都要管，搞到個個都做咗張志明同余春嬌，每15分鐘落街「呼一呼吸」！

3. 離開座位唔可以超過15分鐘，「辦大事」唔該你事先申請

　　強國HR高層認為我出糧畀你，你就應該8個鐘都坐定定喺到同我做嘢。但HR同事深明大家都是人，都有需要去洗手間、或飲水嘅時候，所以批准蝕幾分鐘時間畀大家行個方便。不過，一個健康嘅成年人，平均去一次洗手間需時唔多過15分鐘，所以就規定咗大家離開座位唔可以多過15分鐘嘅規定！由於公司洗手間係同同樓層嘅其他department一齊share，所以出入大門都要拍卡，如果記錄發現你非lunch hour離開多過15分鐘，等收warning letter喇！如果要「辦大事」或者女仔唔方便嗰幾日咁點算好呀？細心嘅HR都好人性化，如果有需要，你只要send個e-mail或whatsapp或任何black & white軟件通知上司，之後用呢個證據去delete record就可以了。真係拉近咗大家同上司之後嘅距離，令大家更close、更親密！

4. 朝早嚴禁食早餐，但你可以去食煙

　　相信好多人每日都要由一杯咖啡去喚醒你每一粒細胞，但有時返工預唔到時間，岩岩好準點達陣，冇時間買精神食糧。喺無為而治時代，大家處理得到手頭上嘅工作嘅話，都會拍卡後落樓買杯咖啡，甚至買早餐返位慢慢歎。但自從座位唔畀食嘢措施實施後，大家就一窩蜂堆晒去pantry食早餐。懷疑控制慾過剩嘅HR見到如斯亂世，就推出咗「辦公時間嚴禁進食」嘅規矩，防止各位奴隸喺辦公時間食嘢！能屈能伸嘅打工仔又點會因為一個障礙而放棄早餐？天網恢恢畀我地發現咗，老闆們因為需要落街「呼吸」，所以HR特別放寬畀同事落街食煙。批准食煙而不批准食早餐，大家一於握緊呢個漏洞，全公司上下連大肚同事都話要落街食煙！只要可以喺15分鐘內買完返黎，不留一個record就完成早餐挑戰。

　　有時，打工仔除咗要抗戰上司，都要同唔同department打長期戰爭。好似唔太受人歡迎但又掌握大權嘅HR咁，今次我地暫時小勝，保得住「早餐」一地，但唔知幾時HR會再出招。下次，唔知大家會唔會變到要吸毒先可以去洗手間！