大家睇民意調查，最成日睇嘅係邊個民調呢？當中具指標性嘅，港大民意研究計劃（港大民研）應該都係表表者喇！而港大民研喺今年7月脫離咗港大後，就成立咗獨立運作嘅「香港民意研究所」（香港民研），繼續提供民意調查研究。不過冇咗大學嘅Backup，燈油火蠟樣樣都係錢，所以佢哋都要搞眾籌先得！

民研有新朵 發布安排Upgrade咗

　　今日香港民研就發布咗佢哋嘅第一個民調，研究所主席兼行政總裁鍾庭耀話，佢哋未來亦都會有新做法，就係會每次發布新民調時，都會請兩個學者嚟分析結果，今日就有浸大新聞系高級講師呂秉權同埋香港文化研究、政治學獨立學者黃偉國幫手，除咗佢哋兩個之外，中大政治及行政學系高級講師蔡子強（蔡子）都有嚟噃！不過佢就唔係嚟做評論，而係單純嚟撐鍾教授場啫！

情與義值萬金

　　蔡子就話，唔計台灣，「喺呢個神州大地上，淨係得香港先有領導人嘅民調，同埋畀大家討論」，相信國內都可以咁做嘅話，中國就唔係而家嘅中國，所以同樣地如果香港冇咗民意研究，香港都唔再係呢個香港，但係呢樣嘢唔係理所當然，因為冇嘢係免費，如果冇大家嘅支持，呢樣嘢消失咗都唔出奇。

　　蔡子仲話，民研係佢事業起點嘅支持者，覺得自己要做返少少嘢，同埋呼籲人哋做嘅時候，覺得應該自己做咗先，所以就以身作則，帶咗張1萬蚊嘅支票出嚟支持研究所。幾多錢唔係重點，心意先最令人感動，鍾教授似乎都冇預計過蔡子突然畀呢個驚喜佢，再聽埋蔡子呢番肺腑之言，都忍唔住淚灑新Office，蔡子自己亦都講到眼濕濕。兩個大男人淚眼相望，Jenny同一眾行家見呢個場面，心中都禁響起咗「情與義，值千金～～～」呢首歌！