A：你有無中WannaCry呀？

　　B：好彩無呀，但有朋友公司部腦中左，開唔到file，好似話連公司IT都搞唔掂。

　　A：其實勒索軟件係咩黎？

　　B：唔知呢，好似話鎖曬你檔案，要比錢先開得返。

　　A：近排全球企業及個人電腦用戶都慘到想喊，因為好多人都中左勒索軟件（Ransomware）WannaCry。呢個勒索軟件擴散速度驚人，幾日內已在150個國家出現，受感染用戶逾20萬，就連英國政府醫療部門National Health Service（NHS）系統都中招。

　　唔好以為香港可以置身事外，根據香港電腦保安事故協調中心，總受感染個案已超過30多宗，當中大部分為個人用戶，亦有中小企用戶。今次事態非常嚴重，小編在此亦深感神的召喚，要贈與世人5大錦囊，等大家遇到同樣情況嘅時候唔駛喊！

WannaCry勒索軟件到底係乜？

　　從電腦病毒，到千年蟲，到木馬程式，近年最hit嘅就係勒索軟件。呢種程式其實係惡意軟件（Malware）的一種，用戶中左之後，電腦系統會上鎖，並聲稱用戶交出贖款先會解鎖，金額從幾十蚊美金到幾萬蚊美金不等，近年出現出現嘅Bitcoin（比特幣）更加助長勒索軟件，因為勒索一方非常難以追查。最近肆虐全球的WannaCry就專攻Windows系统用戶，無論是Window 10還是XP用戶都有機會中招。

醒你5大招預防中勒索軟件

一、時刻備份重要檔案

　　勒索軟件最麻煩之處就係封鎖曬你嘅檔案，其實只要你定期做好備份就唔駛怕。備份的方法亦有很多，企業通常會採用伺服器備份，雖然較使用普通電腦硬盤備份可靠，但遇上勒索軟件，同樣會渣都無。

　　小編建議大家使用自動雲端備份，就好似今次WannaCry事件，軟件主要攻擊Windows系統，而雲端備份操作並非使用Windows系統，並存放在雲端空間，所以能遠離病毒威脅。此外，自動雲端備份能提供多重備份達30個，即使不幸中招，仍可找回較舊的版本進行復原。

二、切勿開啟可疑郵件

　　大多數勒索軟件都是透過電郵散播，好多時勒索軟件會扮郵件中有「copy」、「document」、「scan」、「file」、「PDF」、「exe」等字眼，所以小編建議大家切勿，切勿，切勿開啟來歷不明及可疑的郵件（好重要所以要講3次）！

三、定期檢查及更新電腦程式及作業系統

　　今次爆出WannaCry勒索軟件事件，其中一點就是電腦未有及時更新，駭客就利用這個弱點及漏洞進攻。小編在此強烈建議，特別是使用Windows系統的用戶，必須到Microsoft官方網站執行Windows Update，並時常更新。

四、安裝防毒軟件並定期掃描電腦病毒或垃圾電郵

　　安裝防毒軟件實在係老生常談，但有幾多人知道，防毒軟件都有很多不同種類及功能。例如周全電腦防毒、對抗電郵病毒、過濾垃圾電郵以及防衛駭客攻擊等。其實防毒軟件就好似一個盾一樣，但每個盾嘅大小、防禦功能都唔同。

五、選用可靠網絡供應商

　　正所謂道高一尺，魔高一丈，中小企一般資源不足，遇上駭客攻擊及勒索軟件時，往往只能任人魚肉。小編建議中小企業最好選用一些穩健可靠的網絡服務供應商，不幸有事發生，都有足夠支援作後盾。

　　大家只要還原基本步，做好備份及防毒措施，加埋幫襯可靠的網絡供應商，中小企面對駭客就唔駛wanna cry啦！HKPC在今個月有免費網絡保安講座，大家不防考慮參加。

<中小企網絡保安自保錦囊>

日期：2017年6月20日（星期二）

時間：下午3時正 至5時30分（2時 30 分開始登記入座）

地點：香港九龍達之路78號生產力大樓SME One「中小企一站通」（港鐵九龍塘站C1出口）

費用全免，如欲報名請按此。

查詢：

中小企專頁