「唔使咁麻煩專登嚟探我啦。」

 

　　「偉忠，我一係嚟醫院探你，一係去紅磡拜你，你死過翻生，知唔知？」

 

　　40年老同學，有嗰句講嗰句，百無禁忌，諗番中學嗰時，日日互相取笑戲弄，教我讀書畀我抄功課，估唔到今日做咗救命恩人。

 

　　同學三言兩語，輕描淡寫病危情況，但到呢一刻，我若無其事，無乜危險感覺，好似發咗場夢，仲係傻吓傻吓，嘻嘻哈哈，老婆大人話齋：「你個款，好衰格，無時正經，好乞人憎。」

 

　　我係咁㗎喇，天跌落嚟當被冚，一直以為底子厚，恃住自小運動，50歲仲可以中午踢劇烈足球，經常笑其他孱仔，行兩級樓梯就氣喘如牛，為咗份工，為咗名利，為咗幫仔女移前條起跑線，犧牲健康同埋心靈快樂，搞到毛病多多，值得嗎？點諗得到，有病嗰個其實係我，心臟機能原來咁差，離猝死，只差半步，半步咁大把。

 

　　認真諷刺，我一向畀人健康精力旺盛感覺，無不良嗜好，無胃痛頭痛病痛，無失眠發夢脫髮，無糖尿高血壓，無踎低起身見頭暈，無憂慮牽掛，無精神緊張，無心理壓力，都市人有嘅小毛病，我乜都無，點諗到外強中乾。

 

　　表面睇嚟，你健康啲定我健康啲？連我都差啲瓜，大家係咪要停一停，檢討吓，為自己為家人，改善生活起居飲食習慣。我遲啲順手做埋腦血管檢查，大吉利市，最多擺多兩個支架，你係咪都要做吓全身檢查，再自問一下，有無定時跑步游水登高瑜伽，有無定時遠離塵囂吸啖郊野新鮮空氣，有無定時熄咗電話。

 

　　「幫我買貴一貴嘅裝備，好番就重新運動。」

 

　　「我擔遮陪你散步，好唔好？」

 

轉載自: 晴報

• 

etnet榮獲第六屆國際信息商會議「最佳信息商」白金獎► 了解詳情