2016年立法會選舉，好多老面孔墮馬，部分只係輸個馬鼻，可能係被「雷動計劃」劈中；但亦有部分人，好似馮檢基咁輸得非常難睇，連保證金都拎唔返。不過最令左中右選民感到意外嘅，相信係普羅政治學苑黃毓民過「游」不及，失落九龍西議席。

　　佢輸咗之後，承認自己「從政以來樹敵太多，拖累今次選情」，至於輸喺邊，佢只回答「努力不夠，不要怨人」。的而且確，佢喺選舉當日都無乜留守喺九龍西為自己拉票，一直諗住自己「唔會輸畀個廿幾歲嘅（口靚）妹」，走去為其他熱普城候選人站台催票，但實情係唔係佢唔夠努力而輸？

　　唔計辭職公投，毓民2008年第一次出選立法會，至今選過三屆。2008年奪得37553票，得票率有18.18%；2012年，淨票數增長去到38578票，得票率縮到得返16.62%。今屆選舉，毓民總得票係20219，得票率得返7.1%。   

　　有毓民支持者歸咎「雷動計劃」要求支持黃嘅選民轉投青年新政游蕙禎，加上本民前梁天琦撐游，令到毓民失票。但計返毓民今年得票，加埋游蕙禎嘅得票，都只係得40862，比起2012年毓民自己獲得38578票，只係增長5.9%，遠遠跑輸九龍西整體投票人數增長兩成，更何況游蕙禎嘅票肯定唔會全部來自毓民原來嘅票源，所以今屆毓民失嘅票數係非常多，難以用唔努力去形容。

　　用同樣嘅思維去睇毓民戰友、熱血公民黃洋達，都一樣睇到同樣嘅結果，證明熱血系一路以來嘅路線，的確趕走唔少支持者投向其他港獨自決派系，更加證明香港選民仍然相對支持理性非暴力派系。

　　不過，珍盈對於議會失去毓民仍然感到可惜。名筆李怡喺佢專欄咁寫：「我寫了一句話給黃毓民，說他是『議會中不可或缺的聲音』」珍盈絕對認同，無論大家認唔認同佢嘅理念，佢喺議會上嘅論述層次、引經據典顯示嘅學識、咬文嚼字嘅嚴謹，都無任何一個議員可以相比。失去毓民嘅議會，的確係失色不少。

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

《說說心理話》與你分享被性騷擾解決辦法，大量真實個案，唔同場所如何提防及應對？► 即睇