一篇2013年嘅教育局舊資料，一句「粵語只屬方言而非母語」，無啦啦被網民拎出來翻舊帳，激發起社會新一輪爭拗，我諗形容為新一輪「撕裂」都不為過。

　　特首林鄭月娥出席答問大會，社福界議員邵家臻問林鄭：「你嘅母語係乜？」林鄭「瀟灑」咁回咗一句：「我唔答啲咁無聊嘅問題」直頭係將「撕裂」嘅高潮位帶到去頂點。唔少網民對於林鄭嘅回覆都唔收貨，甚至係劣評如潮，更引來不少網媒二次創作，將林鄭徹底揶揄一番。

　　不過你問我的話，林鄭嘅答案唔知有無計算過，但我認為呢個答法係得體到一個極點，甚至應該寫在「傑出關公」教材之上。

　　首先各位讀者要先搞清楚，林鄭喺講「我唔答啲咁無聊嘅問題」之前，係有回應過邵議員嘅提問，詳細唔再喺度講，其中一句「我哋現在日日都講廣東話，根本唔係問題」，呢句就已經道出林鄭嘅「心聲」，其後邵再追問，林鄭先答出嗰句經典。

　　坦白咁講，對於一個土生土長嘅香港人、一個日日都講廣東話嘅香港人，問佢母語係乜，等同於問佢：「你阿媽係唔係女人？」一樣，真係無聊到極點嘅問題，所以林鄭咁答，個人認為係合情合理合法。但點解林鄭又唔可以大大方方咁話「我母語係廣東話」呢？作為政治人物，答任何問題個腦都要轉得夠快，揀一個面面俱圓嘅答案。好似今次呢條問題咁，答「我母語係廣東話」的確夠簡單直接，但答咗出來會唔會畀有心人抽秤再大造文章呢？反而一句「唔答咁無聊嘅問題」，既係直斥問問題嘅議員有幾無知，亦間接承認「阿媽係女人」嘅道理，呢個真係四兩撥千斤、充滿智慧嘅答案。

　　不過話且說回頭，市場對於「母語」嘅關注，絕對係來自於近年政府有意無意要「陰乾」香港文化同歷史有關，當「中國收回香港主權」、「香港在中國南方」都可能係政治不太正確的話，撼動香港人母語喺心目中嘅地位，又點會唔挑起神經？

　　希望唔好再有人提出啲咁無聊嘅議題……

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

第九屆「傳媒轉型大獎」請投etnet經濟通一票！► 立即行動