1124區選建制大敗，事隔兩星期，林鄭就陸陸續續約見唔同黨派嘅落選區議員，好啲咁講，可以話係慰勞一班建制派區議員多年來盡心盡力為市民服務；衰啲咁講句，成班建制都係畀林鄭嘅傲慢一鑊炒起，見面稱得上係「解慰酒」。

　　據報道，林鄭同落選區議員講到明，希望佢地可以喺社區繼續幫助政府，除咗有錢嘅政黨可以支持佢哋做「影子」區議員，仲會派餅仔，等一班已經服務社區多年、有政績嘅落選者，可以參加唔同公職。

　　不過有見完林鄭嘅建制派區議員就坦言，好多建制議員過往都出任唔同公職、諮詢架構，例如滅罪會、酒牌局等等，其實都只不過係錦上添花，一般選民亦唔會為意佢地做乜乜乜公職，「呢類型公職好多都係得個樣、得個名，津貼係有嘅，但真係夠你食餐好啲嘅飯，旨意佢啲公職開飯，真係多謝夾盛惠」。而呢位建制區議員更指出，林鄭更大嘅動作去「支持」佢地，更可能係得不償失，會畀中間選民更加覺得政府同建制派私相授受，未來選戰，特別係出年立法會選舉更加難搞。呢位仲有兩星期就卸任嘅區議員仲話：「佢想我地真心原諒佢？我諗佢自己知點做！」

　　區議會選舉以外，立法會將係另一個大戰場。有消息就話，政府高層好可能喺明年初大改組，律政司司長鄭若驊、保安局局長李家超以至係民政事務局局長劉江華都係換人名單。Tina同建制派立法會議員八過，佢地都話事前無聽過有關消息，似係誤傳居多。有建制議員認為，政府改組唔係問題，但問題在於個「頭頭」唔換，換下面嘅人，究竟有幾多有質素嘅人願意呢個時候入政府跟個咁嘅「頭頭」，呢個已經係一大疑問。而最大問題就係，如果唔換「頭頭」換班子，咁下年立法會選舉，建制肯定又會打場大硬仗，「到時唔單原唔原諒嘅問題，可能將會正式成為仇家！」

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

《說說心理話》心理急救II：幾個徵兆辨認身邊人需要心理支援！點樣對情緒進行急救、自我照顧？專家分享穩定情緒小練習► 即睇