港台長壽節目《鏗鏘集》嘅一名編導蔡玉玲，噚日(3日)被警方拘捕，昨晚亦已經獲准保釋。呢位編導正正有份制作有關《7.21事件》嘅專題節目，節目入面提到當日喺元朗出現過一啲接載白衣人嘅車輛，《鏗鏘集》透過車牌查冊，追查當中幾架私家車嘅持有人，並根據車牌登記地址，逐一摸上門去嘗試搵相關車主。亦因為呢個查冊嘅動作，蔡被指涉嫌違反《道路交通條例》，以不正當資料做車輛查冊，作出虛假陳述而被捕。

　　今次警方咁高調去拘捕一名港台嘅編導，從不同方面去睇，都令好多市民(更包括外國媒體)有一個非常唔好嘅感覺。Tina首先要講明，從一位專門做偵查報道嘅媒體朋友口中得知，傳媒一直以來係可以因為報道而去查車牌號碼，過往亦有唔少「踢爆黑幕」嘅報道，都係靠車牌查冊去搵到事件主角有所關連，所以呢個方法絕對係傳媒一直用緊嘅「武器」。

　　只不過反修例事件之後，「起底」情況日益加劇，政府避免一啲警員嘅車輛被起底，先走去修改申請查冊嘅規定，變相令到傳媒唔能夠因為報道為由去查冊。

　　講到呢度，總會有讀者講得，既然依家條例清晰，咁警方拉人真係無可厚非。呢個絕對正確，佢地的確有權拉人，但拉人以外亦都有更多嘅問題要問警方，包括《7.21事件》嘅嚴重性比起蔡玉玲查冊大好多，咁節目入面查冊提到嘅人物，警方又有無搵佢地協助調查？又有無好似蔡玉玲案件咁高調？一單咁簡單嘅作出虛假陳述，點解會交由重案組去處理，係因為個編導係大奸大惡之徒？定係報道有嚴重殺傷力？就算拘捕，個編導有名有姓，又係港台嘅合約員工，又唔會因為咁而潛逃，咁又可唔可以預約拘捕？

　　據聞警方今日會見記者交代具體案情，但Tina真心認為，警方喺呢個時刻，對蔡玉玲作出拘捕，唔單止令市民覺得警方係有權用到盡，更令人質疑，警方係唔希望任何媒體再作出批評警方嘅報道，咁樣對解決當前支持泛民陣營市民同政府對立嘅情況，只會係有害無益。

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

【與拍賣官看藝術】走進Sotheby's Maison睇睇蘇富比旗艦藝廊！蘇富比如何突破傳統成規？► 即睇