個勢真係好勁!

 

　　他是一個龐大機構的重量級人物，姑諱其名，就稱他為勢哥吧。

 

　　他人未到，勢先到。

 

　　「勢哥嚟咧，醒定D!」

 

　　真係如摩西過紅海，所向披靡。

 

　　為甚麼有如此威力呢?

 

　　原來他超精明，又超心急。

 

　　眼神清而露，善謀善決策；雙眉濃而短，分秒必爭。

 

 

　　他會同時囑咐你做五樣工作，一回頭就問你做成點。不習慣multi-task的，會嚇到手忙腳亂，然後心中暗忖:

 

　　「你估我係都教授咪?」

 

　　好咧，到你去到星球人的效率層次，全部火速完成，衝入佢間房匯報:

 

　　「你頭先叫我做嗰件事已經攪掂。又已經搵咗佢，佢覆番冇問題。另外，你話要開嘅會，已經安排好。」

 

　　勢哥竟然黑哂塊面問:

 

　　「邊件事?邊個佢?乜嘢會?精確D好唔好?」

 

　　原來他同一時段，向十幾人發施了十數號令，他根本不知道你說甚麼。

 

　　你與他談話，最好一劈頭便列明有幾件事，否則你講到第一件半，佢已經打斷你:

 

　　「你究竟仲有幾件事要講?」

 

　　如此講究說話效率的人，自然對廢話零容忍。你唔好咁多起承轉合、細意鋪陳。可以用9個字講完，唔好用10個字，否則又捱罵。

 

　　罵還罵，他又真是「明君」喎，對公司的事情，他觀察入微，瞭如指掌，而且知人善任，最叻揀卒，下屬雖然間中烈火焚身，但因為老細真係叻，大都死心塌地，被他鍛鍊成人材。眼神清嘅老細，塞錢入你袋，前途錢途皆備!

 

　　一次他與一新丁在參加完公司活動後，閒聊時，突然對她說:

 

　　「如果我一年後唔升你，你係咪會走?」

 

　　新丁唔知佢係問佢、讚佢、定係兇佢，惟有支吾以對。

 

　　「唔駛兜咧!」他立刻戳穿她。

 

　　一年後，果然升了她。

 

　　跟著一個有氣勢、有才幹、有承諾的上司，實在是一種難得的機遇。

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【與拍賣官看藝術】東南亞藝術市場是下一個熱點？一探各地獨特及吸引之處！► 即睇