感人的管理學

　

 

　一枱似乎曾經滄海的管理層人馬，在溫柔飽滿的2002 Saint-Emilion與酒體好爆的2008 Shiraz之間，喝酒水、吐苦水。

 

　　有人慨歎勞資雙方永遠對立，無朋友可做。

 

　　「最緊要係感動佢！」馬華獨排眾議。

 

　　馬華應該是與阿里巴巴的馬雲來自同一星球，其另類頻率如出一轍。

 

　　「即係你狂sell佢？」我慣於將包裝剝離，還原赤裸現實。

 

　　「我係convince佢，我哋賣嘅係super product ，在本公司有super 前途，佢可以做 super hero !」

 

　　「呢招嘅魔力有年齡限制喎。你公司員工平均年齡幾多？」我問。

 

　　「廿五。」

 

　　「唔怪得，尚未結婚、生子、供樓、未被責任綑綁。」

 

　　「我係滿懷熱誠，以serve 佢哋嘅精神出發㗎，我對員工、對顧客，一律如此。」

 

　　「嘩！正能量爆燈喎。」

 

　　「當然，喺呢個打動人心嘅遇程，我可能利用咗佢！」

 

　　「嗱！良心發現咧。」

 

　　「其實我係正邪之間嘅！除咗做靈感教主之外，我都做惡人谷谷主，因為我哋係做supply chain嘅，品質方面，一絲不苟，奄尖到冇人有，有時都幾難頂㗎！」

 

　　看他兩鬢微霜，早生花髮，不知是否因為每天在天貓、淘寶與消費者辛勤互動，又或者是在創業過程中遇了些挑戰，如今已漸漸兩腳著地。不過眼神仍然靈動機警，偶爾不留神還放射出一絲mischief。皮膚不俗，明顯天生善解人意、擅於溝通。整個組合，就是善於捕捉機會、打動人心啦。

 

　　說穿了，他的感人管理學，也是建基於個人魅力上，此招無charm不行呀！

 

　　我已經飲到wing wing地，益發覺得他有道理，來，為魅力乾杯！

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【你點睇？】皇馬巴塞傳奇表演賽爆簽名會風波，26人買涉$20萬套票僅見部份球星15分鐘，你認為事件哪方須負較大責任？► 立即投票