早來的巨門化忌 明年爭拗更烈 你應如何應對？

　　I know I am stating the obvious。

 

　　阿媽係女人。

 

　　但明年阿媽會更女人，係潑女人！

 

　　2017年係丁酉年、酉屬雞，名符其實係鐵咀雞，大家都咁牙尖咀利，寸土不讓。

 

　　又丁年巨門星化忌，即容易因言惹禍，亦即易有口舌是非，爭拗撕裂。

 

 

　　今年中秋之後，氣數已現。

 

　　在美國，總統之爭變成口水之戰，特朗普因發表侮辱有色人種及女性言論，徹底為自己倒米；希拉莉則因多次電郵（也屬communication闖的禍）而被對手拖住後腿、死咬不放。

 

　　歐盟亦攪撕裂，英國要脫歐，歐盟會同佢死過，講明唔會令英國有啖好食，只會奉送鹽同醋！

 

　　香港立法會則有新舊勢力較勁，一開波就紮行馬。巨門星主語言，巨門化忌即講錯嘢，宣誓玩嘢就係因講錯嘢而要孭飛。

 

　　展望來年，相信立法會及政府，都少有實幹之事，多有口舌之爭，而且動不動在法庭上片過，亦應驗了巨門化忌所主的訴訟官非。

 

　　如果大圍如此被無能、無知、無聊、無奈所騎劫，那麼我們在個人層面，有甚麼可以做呢？

 

　　一.既然大勢多爭拗，無論你喜歡與否，政局與社會，沒有最亂，只有更亂，此屬攬炒格局。我地小市民，有機會就發聲，亦應盡一己綿力，成就好人好事，助長正能量，有光的地方就少了暗，少了化忌的戾氣。

 

　　二.對家人或朋友，切忌囉唆。就算你覺得自己實在智慧到極點，也是點到即止就好了，凡事說一次就夠，見好即收，見唔好更要收。

 

　　三.公事上，忌無聊吹水，少講好過多講，唔講好過亂講，盡遲表態、盡少插咀。

 

　　四.忌刻意吹噓；巨門化忌時，宜保持低調，反面教材乃特朗普，他炫耀自己避稅叻及媾女醒，結果死在自己口中！

 

　　總之，明年是火藥味重之年，個人明哲保身，切忌言辭惹火、行為火爆，小心種下禍根，惹來烈焰焚身！

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【香港好去處】etnet全新頻道盛大推出！全港最齊盛事活動資訊盡在掌握！► 即睇