要明白雞年的徵兆，便要了解猴年翻開了甚麼局，然後推斷雞年如何在這局上推展延伸。

 

 

　　丙申猴年的申與新同音，的確打開了一些新的pandora box，釋放了許多新勢力和新炸彈。

 

　　香港政壇出了好些新面孔，國際舞台則出了些新狂人，你可以話:車，年年都有新嘢㗎啦!但香港舊年兩次選舉，跑出嘅新人真係來勢洶洶，絕非一般人始料所及。國際政壇則出咗兩個狂人，菲律賓總統杜特爾特鐵腕掃毒之際，坦白承認自己習慣親手處決嫌疑毒犯(註)。另一狂人特朗普則習慣非禮靚女，兩人竟將色情暴力提升至領袖層次!展望雞年，好多人都會撕爛塊面，而搏到掌聲，由於雞年丁酉仍是火剋金，更兼巨門化忌，會有好多open confrontations。即大家紮行馬，一於砌個你死我活，隻抽又有、群毆又有，「攬炒」更多，我地受過猴子式訓練，今年就唔會大驚小怪咧。

 

　　另一新局面為民粹及極端主義迅速坐正。我們去年已見證了傳統價值觀的大規模撻Q。甚麼顧全大局、救急扶危、人道主義及環保概念頓成為選舉毒藥，國國為己、人人為己。去年繼有英國脫歐、特朗普當選、意大利修憲失敗。跟住今年法國、德國選舉，應該食住呢條水。猴年立春八字三火四金，雞年則四水二金，五行都係偏埋一邊，所以極端思維、極端勢力絕對有市場。

 

　　又丙申、丁酉兩年都是火金大戰。有甚麼情況是火和金同時發威的呢?就是槍火爆炸，因此恐怖襲擊繼續震撼世界、鮮血繼續流。所以大家去旅行，要小心各國各城的南邊，因此乃五黃災星所在。同時避免多人狂歡熱點，太hot就會出事。

 

　　丙申年八字偏埋一邊，亦反映在自然災害上，正如好意先生所說，猴年勁秋大火，所以香港熱爆，全世界火災頻繁。雞年則大水，預料會有大規模山決水災，住近水的人要預早防範了，又凡事業或家園可能受水災影響的人，宜買重保險。

 

　　好意先生又說，丙為病字尾；酉為醫字尾，因此兩年都多細菌病毒，2016年有寨卡，2017年醫生一樣好生意。雞年禽流感亦可能猖獗，去年十二月南韓已錄得53宗禽流感病例，撲殺了一千萬隻家禽。今年一月法國盛產鵝肝的地帶又發現了近九十宗禽流感，毀滅了二百萬隻鵝鴨。上周香港則有一市民測得對H7N9病毒呈陽性後過身。大家喜歡食雞鵝鴨都要克制D咧。

 

　　看來今年世界會面對許多偏激、得威、不平衡，不安全。幸好香港是福地，少有天災，我們小心人禍吧!

 

註:杜特爾特自上任以來，處決了二千多人，還有三千人在未知原因下被殺。他稱自己駕電單車四處找尋滋事者，因為「這樣我才能殺人。」他又稱自己在達沃市時，親手殺死嫌疑犯，為警員示範。

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【香港好去處】etnet全新頻道盛大推出！全港最齊盛事活動資訊盡在掌握！► 即睇