樓價只上不落 背後有個鮮為人知誘因

　　香港樓價連升25個月，5月份又催生了地王，港樓的升浪，正波瀾壯闊，濺起的水花，深入民家。

 

　　朋友是青年才俊，無論事業前景或居住環境，都可謂擎天一柱、底氣十足。

 

 

　　有一陣子他有點納悶，為甚麼對面的二千呎單位，常有不同的人出入？難道富豪業主有一噸親戚，輪流來君臨維港？他後來與跨境營商的朋友談起來，才發現香港樓市熱上加熱，原來暗裏有一把火！

 

　　「你有所不知，國內富豪，喜歡喺香港買豪宅，真係一物多用。」他朋友解釋。

 

　　「投資？定自己住？」才俊問。

 

　　「佢哋自己來港就住酒店嘅。」

 

　　「咁層樓攞嚟曬太陽呀？」

 

　　「係曬，不過係曬排場。佢哋通常一買就兩層，一層打通，做三星食堂，一層就做五星賓館。」

 

　　「哦！用嚟招呼貴賓。」

 

　　「你知啦！自從打貪雷厲風行以後，無論名錶、名女人、名店、名酒店、名飯店都唔可以沾上關係，畀人影到，烏紗不保！香港啲豪宅，由地下停車場直通(車立)層，直達樓層，privacy奇高。而且高幹都珍惜自己條命仔，喺外面食飯，點都油膩兼重口味，呢啲富豪請私人廚師掌廚，包保唔會用萬年油，而且全無成本考慮，食材要幾靚有幾靚。賓主摸完酒杯底、傾掂合同後，高幹可以坐番(車立)去另一層休息。方便、優雅、隱秘、穩陣，真係神不知鬼不覺。」

 

　　「咦！傾到大刀，呢啲成本完全值得。」

 

　　「係啦！富豪有呢啲物業，仲可以一路自己風光，一路資產增值，呢啲投資唔只自負盈虧，仲可能有倍計升幅，所以國內富豪一定支持香港樓市，就等如支持自己生意一樣啫。」

 

　　原來港樓有如此妙用，難怪成為兩地投資的重中之重。

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【你點睇】陳美寶、羅淑佩分別被任命為運物局及文體旅局局長，你是否認同新任命有助香港鞏固物流樞紐地位及促進旅遊經濟？► 立即投票