【鬼節趣聞】死後竟有中途站？

　　陽間攪顛覆，陰間攪建設！

 

　　就快農曆七月十四，人稱鬼節，最近遇到奇人，所談可謂聞所未聞。

 

　　「地獄正在擴建中，我睇到下面有工程。」

 

　　「吓！係咪壞人太多，迫爆地獄？」我問。

 

　　「唔係。只係擴建中途站啫。」

 

　　「中途站？」

 

　　「哦！罪分大小，好清楚嘅。殺人放火、禍國殃民，就梗係坐express lift，直落地獄總部啦。如果只係偷人少少嘢，或者欠咗少少債，例如小時偷同學粒糖；或者佛教徒，在佛前承諾咗念經文漏數抄經又吞卜……等等，咪嚟呢度囉。」

 

　　「做乜呀？」

 

　　「偷糖就要做番啲農務，幫吓甘蔗農夫囉。」

 

　　「下面都有農夫咩？」

 

　　「下面同地上面嘅場景差不多嘅，至於啲走數嘅佛教徒，咪補番數囉。」

 

　　「咁做佛教徒咪好唔著數？」

 

　　「唔係嘅。你要明白：第一，中途站好舒服嘅，不愁衣食、冇煩惱、冇人蝦，只要老老實實補飛，係幾寫意嘅。第二，你喺諸佛菩薩面前認真許願念經抄經，唔只係為自己，旁邊嘅靈界眾生睇咗聽咗，都會開智慧、分到功德嘅，所以唔可以走數。第三，唔只係佛教，其他宗教，亦各有其處理大小罪過嘅方法。」

 

　　「好多人以為宇宙只有一個真理、一個真神、一個真教咋喎。」我有疑問。

 

　　「宇宙係多元嘅，講番地球先。人死咗，會好似去急症室咁，依宗教分流嘅。」

 

　　「咁會唔會走錯㗎？」

 

　　「會。有時有其他宗教嘅亡魂嚟咗我地幫手㗎。」

 

　　「你點處理呀？」

 

　　「搵番佢哋負責移民嘅揸弗人，領番呢啲迷途羔羊走囉。」

 

　　「咁係咪其他宗教亦各有天堂地獄㗎？」

 

　　「係呀。聽講基督教系嘅天堂，飲紅酒聽豎琴，好優雅嘅。佛教呢，其實有好多天堂，最出名係西方淨土，嗰度好有電影感——鮮花飄落，眾鳥和音，仲有七寶樓台、琉璃瑪瑙，隨處皆是，而且成日有七彩幻影light show。不過你唔好以為自此歎世界，其實，喺咁微妙香潔嘅環境中修行，畢咗業要回流番人間，幫助啲好迷失嘅人，處理啲好甘嘅case。」

 

　　「咁呢個天堂咪即係美麗嘅中途站啫？」我問。

 

　　原來只是用一個彩光幻夢換人間幻夢！

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

《說說心理話》心理急救II：幾個徵兆辨認身邊人需要心理支援！點樣對情緒進行急救、自我照顧？專家分享穩定情緒小練習► 即睇