【終極致勝之道】喺職場幫自己做好branding（下）

　　消費者未必懂得分辨普通礦泉水同「雪山」礦泉水嘅味道，但點解總有人肯繼續畀三倍價錢買一枝「雪山」礦泉水解渴？同樣，你嘅工作能力可能同身邊兩三位同事差唔多，但點解老細總係比較偏心某位同事，而佢得到嘅機會總係特別多？

 

　　懂得營運職場上嘅個人品牌可能係佢哋嘅致勝之道。上集提到「Brand Preference」同「Word of Mouth」嘅重要性，今集再談另外兩點。

 

 

「Brand Consistency」

 

　　每一個廣告、每一個campaign、每一次用戶體驗都係公司同客戶溝通嘅機會。一間公司是否能夠喺不同渠道傳遞一致嘅品牌形象非常重要。有連貫性嘅品牌形象 (brand consistency) 能讓公司形象更鮮明，令客戶對你嘅印象更深刻。一般公司都會制定品牌使用守則 (branding guideline) ，從公司標誌大小、顏色、字體等都有嚴格要求，務求令客戶喺唔同時段、唔同平台嘅體驗一致。

 

　　職場上，時刻維持應有形象同樣重要。曾經有一位男Assistant Manager工作表現不俗，話頭醒尾，喺老細群中有唔錯嘅評價。上兩個月公司team lunch，男AM喺席上無間斷地用手機捕捉Pokemon，仲同身邊幾位女同事討論「office有好多大岩蛇」等話題。同枱嘅大阿姐全部看在眼裏，就喺上星期一個會議中，有意冇意，以似講笑又認真嘅口吻，揶揄男AM如果喺公司用少啲時間做精靈訓練員，其實可以更productive。

 

　　其實打工仔每一刻都不斷喺老細同同事面前塑造緊自己嘅形象。無論你想話畀人知你「好專業」抑或「好細心」，敬請時刻維持你個人品牌嘅連貫性，為自己設定應有嘅personal branding guideline，咁先可以有效說服別人。

 

「Brand Value」

 

　　以往宣傳一個產品，好多公司會將重點放喺產品質素有幾好、或者售價有幾低。到近年好多campaign已經趨向重點推廣品牌價值 (brand value)，例如「想做就去做」、「敢於創新」、「簡約人生」等，希望以獨特嘅理念突出品牌個性，而客戶亦可藉使用該產品顯示自己嘅品味及與眾不同。

 

 (Red Bull經常將品牌理念融入宣傳campaign)

 

　　如果叫你老細只用兩句說話去形容你，你又最想聽到啲咩？喺公司搵啱定位 (proposition)、突顯你嘅專業個性 (personality) 可以為個人品牌塑造更立體形象，強化你喺別人眼中嘅長處，從而建立老細對你呢個品牌嘅「忠誠度」(brand loyalty)。到佢想搵一個得力助手解決問題，甚至想搵人升職，老細自然第一個諗起你。當然每個人喺唔同公司、唔同崗位上嘅定位都唔一樣，所有請定期為自己嘅定位作評估，找出你當時嘅最佳位置。

 

　　無論你係咪marketer，喺職場上如果要贏人，請先懂得market自己。

 

延伸閱讀：

【畀老細知道你嘅長處】喺職場幫自己做好branding （上）

 

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

《說說心理話》心理急救II：幾個徵兆辨認身邊人需要心理支援！點樣對情緒進行急救、自我照顧？專家分享穩定情緒小練習► 即睇