【小編難做】怎擺脫Facebook「一手交錢，一手交reach」困局？

　　近日有好多讀者朋友問到Facebook「零reach」後嘅對策，記得早年出席marketing講座中，已經提到social media會慢慢步入「零reach」時代，將會正正式式地變成「social paid media」。而早前Facebook開始「試驗」推行「一手交錢，一手交reach」（其實已經唔係第一次做呢件事），當然回響最大嘅一定係我哋呢班marketer同廣告人，本身 Facebook marketing 競爭已經大，呢件事將會令大家百上加斤。

　　記得大約 2 年前已經開始幫客戶／公司為「零reach」作準備，除咗幫唔同公司喺唔同情況下，制定一套專屬嘅策略之外，另外最簡單快捷能夠做嘅事情係，先減低出posts嘅數量，再將部分budget轉移到social advert上，每一個posts都落advert去keep住social reach 同momentum，由當年重量唔重質嘅「daily post」，變成後來重質唔重量嘅「quality post」（而老細永遠要求重質又重量但又冇budget嘅 daily quailty post）。所以近期「零reach」事件嘅發生，相信對部分有準備嘅公司嚟講並唔意外。當然，講發生咗嘅事就人人都知，有馬後砲之感，但如果再將件事拉長啲睇，未來又會點呢～

　　先談談「一手交錢、一手交reach」帶來嘅影響。如果真係全面實行，最先受影響嘅就應該係中小企同埋中小型KOL。因為只要Facebook股價一日要升，advert 嘅market price就必定要跟住升，而中小企因為冇足夠資金不停地買reach，就算有少少budget，但因為競爭太大，比咗錢都返唔倒數，愈做愈冇意思，最終放棄。而小小嘅KOL更甚，接job嘅錢都未必夠比advert錢，得不償失。最後可能係只會得返大公司嘅pages，同埋一班可以做到好content嘅KOL，先有能力可以存活。之後再過一輪，因為個個都比錢買reach而令content 質素下降，大多都係sale and promotion 嘅content，讀者「愈睇愈冇引」。所以Facebook如果真係全面實行「零reach」，係有少少兵行險著。

另類收費模式

　　既然social paid media係冇可避免嘅事，畀錢Facebook 、Instagram或者其他social platforms派reach又可能愈派愈多「水分」，慢慢呢類收費方式嘅平台對品牌公司嚟講愈來愈冇著數，比咗錢都未必攞倒想要嘅fans或者engagement，所以之後就有可能會出現一啲另類收費平台。估計後來將會有兩大主流平台，第一類就係類似Facebook咁「一手交錢，一手交reach」，不論文案好醜，只要比錢就基本上搞得掂，而網民大多只會睇到sponsor post。而第二類可能係一啲「唔理大細，劃一收費」嘅平台，以會員制／月費嘅方式向品牌公司收費，文章會論功行賞，好文就高reach，平衡平台嘅文章質素，而網民就可以免費睇到所有／部分post。感覺有啲似收費電視咁，一係就收費頻道，一係就比錢買電視盒子，不過唔同嘅係，畀錢嘅唔係網民／觀眾，而係品牌公司。

　　而「零reach」後，content嘅用法同KOL重要性都會有所改變，下星期再談談品牌公司喺content 之上嘅對策。（下期待續）

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

【香港好去處】etnet全新頻道盛大推出！全港最齊盛事活動資訊盡在掌握！► 即睇