【避不開惡死同事？】返工跌晒watt？可能是你自信心不足！

　　近日同一個師弟食飯catch up，得知佢工作上遇到一個難題。準確啲講，佢係遇到一個“difficult person”。

 

　　師弟喺現公司做咗兩年中層，絕大部分工作都可算得心應手。但每逢要夾其中一位同事做嘢，師弟都會有如熱鍋上嘅螞蟻，周身唔自在，工作效率同質素亦會相應降低。我問師弟究竟原因何在？

 

　　「因為佢好惡。」師弟諗都冇諗就講出原因。

 

 

　　「每次同佢講嘢，佢都無尾音。問佢嘢，佢又會反問返我幾條問題，次次都搞到好似係我唔啱咁。有佢喺度開會嗰時，佢好似有一道氣場，佢講啲咩都係啱，搞到我有意見都唔敢講。」師弟一口氣數晒出嚟。

 

　　我用筷子夾咗一舊大Toro壽司去師弟嘅碟上，安撫一下佢，然後答。

 

　　「佢講嘢無尾音，可能只係因為佢無禮貌；你問佢問題，佢成日都反問返你，可能只係因為佢都冇答案。」

 

　　「你成日被佢嘅行為表現影響到你嘅工作，其實都係因為你自己。」我將責任推到師弟身上。

 

　　「又關我事！」師弟未吞晒嘴裏面嘅壽司，已經即刻反問。

 

　　「Yep，因為你自信心未夠。」我答。

 

　　一個人喺工作上嘅言行舉止，如果能夠處處顯示出自信，自然可以給予上司、同事、下屬多有一份安心，同時亦會多加一點尊重。自信心可以從你嘅卓越工作能力、非凡往績而建立，同時亦可以從平日嘅一舉一動慢慢累積。例如喺會議中多做有建設性嘅總結、勇於發問；回覆電郵之前，多花時間做資料搜集，令內容比其他人更言之有據。久而久之，同事就會知道你係一個有準備、講嘢有根有據嘅人，你喺別人心目中嘅地位亦因此而提升。同事開始尊重你，你做嘢時嘅自信心亦會相應提高，兩者相輔相成。

 

　　「我聽日同佢又有個meeting，我應該點面對佢......」師弟問。

 

　　我食埋最後一啖抺茶雪糕，然後答佢。

 

　　「記得，佢惡唔係重點，佢講嘢有冇內容先係。惡死同事、賤格上司、縮骨下屬喺辦公室裏面又何止一個？你唔會避得開，亦唔需要避。」

 

　　「要別人尊重你，你先要懂得尊重自己嘅工作判斷能力。」

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【你點睇？】有學者倡60至65歲以下長者之2元乘車優惠，設每月補貼上限700元，你點睇？► 立即投票