梗有一間喺左近！茶飲市場表面「長青」實質萎縮？想突圍要捉緊「朝代變遷」？

　　「茶顏悅色」係一間主打中茶西做嘅連鎖茶飲店，去年12月於內地一線城巿開設新分店。開店初期引來大量顧客排隊，茶顏悅色更於社交平台上載貼文，表示現在排隊時間長達8小時，該情況一道成為網民熱話，其後更出現黃牛炒賣，對比當年「喜茶」氣勢有過之而無不及。

　　其實自多年前台式茶飲品進軍香港巿場後，隨即大受歡迎，大大杯嘅珍珠茶飲由當年只於台式餐廳出售，到後期從餐廳內走到餐廳外，演變到今日「梗有一間喺你左近」嘅方便飲。以連鎖特許經營模式令其成行成巿，而飲品類別亦唔再係「台式」專利，更推出中式茶、港式茶、水果茶、養生茶等等。雖然方便飲品推出多年，好多人都覺得呢門生意已經去到「盡頭」，但其實每年都有新人加入戰線，成績仲十分亮麗，不其然令人覺得該巿場依然不死。

　　據一項數據指，估算呢類方便飲嘅主要客群大部分為女性，男性則佔2-3成，而消費次數最多係學生。雖然學生消費力唔高，但佢哋必定係最喜歡「嘗新」嘅一群。加上學生客群對味道／健康相對地唔算太講究，所以就算多年來方便飲出現好多大大小小嘅問題，譬如飲品加入咗化學成分、茶包並非真茶葉等，只要喺品牌上、飲品模式上作少少改變，最後都能夠吸該客群重複消費。

　　方便飲巿場好似擁有一班「長青」客群，舊客去、新客不斷替補，但事實係市場慢慢出現萎縮情況，巿場嘅生命周期愈來愈短。為迎合主客群貪新鮮嘅習慣，一間茶飲店一年前可以大排長龍，不過一兩年後可能已經水盡鵝飛，創業成本變相相對地提高。另一方面，因為客群集中，巿場就算不斷推出新產品／新品牌形象，亦最多只能刺激新客戶短期消費，並唔能夠吸引新客戶成為長線客群，唔能夠開拓新藍海亦係一個潛在問題，發揮空間有限、難以突破。

　　唔同行業都有著自己「朝代」嘅變遷，留意並捉緊下一次變遷嘅轉向，先能夠有較大機會突破。但如果變遷後冇增加太大銷售客群，或者係冇改變客戶消費模式，最後該行業只會停留喺同一個層面不斷循環。新加入嘅競爭者就需要另覓新地域發展，或重新改變創業策略，令自己成為突圍而出的一群。 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

第九屆「傳媒轉型大獎」請投etnet經濟通一票！ ► 立即行動