在過年期間，我不時被人問現在是否可以買自住樓，因為有評論員話在去年11月底，樓市已經開始谷底反彈，亦有評論員話樓市到了年初七，已經調整完成，再次向上攀升，如果現在唔買樓，恐怕會錯失良機，他們其實早已打算買樓，問我其實是多餘，不過在新年期間，很多事都是多餘，就算恭喜人都是多餘，當然是望人富貴，唔通希望別人閉翳？問我好不好買自住樓，一定要話好，唔通話唔好，但要想一個好答案，如果又學誠哥話量力而為，一定會被人噓。

　　我記得第一次買樓，見到燊哥，順便問一問，燊哥知道我是澳門仔，不但是第一次買樓，而且資金不多，於是連想也不想就話「孤天寡九，唔打又一首」。打天九的人知道，一副牌只有一隻天或者九，能夠結牌的機會很少，如果要結牌，一定要等到尾二才出牌打人，而最後一隻細牌又沒有被人打，但機會始終不大，但如果等結牌，隨時一揀都冇，有一楝輸三，一楝都冇輸五，所以，一般打天九的人揸住一隻天或者九的牌，倘若有機會，連考慮也不用，一定會大力打下去，唔識打天九的人未必會明白，香港好似是唔准打天九，因為天九可以隨時變成排九，天九牌就變成賭具，香港仍然是禁賭的。

　　只有能力買自住樓的人就好似揸住一隻天或九，如果要考慮清楚，又擔心甚麼甚麼，始終買唔到樓，到最後樓價又升了，他們又後悔到不得了，其實只得一注錢買樓，就好似孤天寡九，還需要考慮甚麼？買樓當然是有風險，但樓市長遠必升，現在唔買樓，可能永遠都唔會買，買樓的人如果只得一注錢，而又有需要的話，根本不用問其他人，孤天寡九，唔打又一首。

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

【你點睇】陳美寶、羅淑佩分別被任命為運物局及文體旅局局長，你是否認同新任命有助香港鞏固物流樞紐地位及促進旅遊經濟？► 立即投票