超級豪宅不租，頂級甲廈不賣

　　有國內老友打算在香港開公司，首先是租一個超級豪宅，無論是一間屋或者一層樓都可以，然後再買一層頂級甲廈，但始終搵唔到，佢同我呻，話已經同物業代理講，豪宅租金與甲廈樓價是沒有問題，但始終租唔到超級豪宅以及買唔到頂級甲廈，究竟香港地產商是否有錢唔賺。

(資料圖片)

　　我同老友講，不如將目標掉轉，買一個超級毫宅，租一層頂級甲廈，很快便會如願以償，老友話明白，不過，買一個超級豪宅要付30%辣招印花稅，實在唔捨得，而租一層頂級甲廈，租金隨時是樓價3%，仲要交差餉管理費，在低息環境下，好似替人供樓，相當不值，萬一地產商或者大業主在租約到期後收回，咁就好似俾人拆招牌，做生意的地方一定要買，住的地方可以租，老實說，咁就難搞。

　　並不是地產商唔想租豪宅，但是成本太重，回報太低，每一個租客的租用年期平均3至3.5年，回報1至1.5%，當租客搬走之後，維修費隨時用了一年租金再加上時間，令到淨收入減少，回報更低，所以，地產商是不會將超級毫宅出租，寧願善價而沽，而且買超級豪宅的人有可能唔希望所買的豪宅有人住過，所以，豪宅只賣不租，好彩林鄭撤回新樓空置稅，否則地產商就要被逼減價賣超級豪宅，隨時會對冧香港樓市，沒有新樓空置稅，地產商的豪宅只賣不租的信心更加堅定。

　　做地產生意的人知道，一幢大廈，一個商場，如果拆售的話，樓價一定會貶值，冇必要都唔會拆售，除了那些鍾意玩拆場的炒家，才會拆售商場，而一幢優質商廈，一個頂級商場，如曹操所說，三軍易得，一將難求，既然有3%回報，點解要拆售，而且回報會愈來愈高，拆售並不是明智之舉，所以，就算捨得俾錢，都很難買到頂級甲廈。

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

【與拍賣官看藝術】東南亞藝術市場是下一個熱點？一探各地獨特及吸引之處！► 即睇