行行出狀元，物業代理界亦然。同做地產經紀，有的氣質似古惑仔，隨時隨地為爭地盤開片。有的，則似打工皇帝，意大利西裝名錶名車，新聞時事通識皆掌握兼話頭醒尾，彬彬有禮有風度。

　

　　你是大客，你會用哪一個形像的經紀？儍的都知答案！

　

　　香港物業經紀二萬多人，最頂級的，當然是做香港南區及半山到山頂物業那幾隊。

　

　　狀元級人馬，當然也是服侍狀元級人馬。前者是物業界代理狀元，後者則為商界及打工界狀元，物以類聚惺惺相惜也。

　

　　講個真實故事大家知，各位可記得大約四個月前，山頂出咗一宗「驚天大Deal」？正正是兩位香港打工皇帝袁天凡及李慧敏（恆生銀行行政總裁）出貨也，將山頂白加道獨立屋，以天價15億元沽出，實用呎價逾十五萬一千多元，幾近全球最高記錄。袁天凡眼光獨到，官商政界人盡皆知，今次持貨十五年升值八倍，帳面大賺逾十三億，點到你唔服？

　

　　這項世紀交易，亦造就了一位「山頂經紀」發達，因為，一項十五億交易，佣金千萬計，真的是一單買賣成功已可喊：「我要退休！」

　

　　這個世紀大Deal ，有個幕後故事，從未有人爆出，等我爆！

　

　　話說，中國首富馬雲，目光如炬，深知香港山頂獨立屋升值能力不凡外，風水也特佳。所以，早早掌握哪間山頂物業值重金投資兼入住。於是，召來御用經紀落「柯打」，指住山頂地圖講：「我有三間屋想買，第一，呢間；第二，呢間；第三，呢間！」

　

　　馬雲逐間心頭好向鑽石級山頂經紀道明，間間皆非比尋常。

　

　　經紀皇帝一睇，眉頭深鎖，因有兩間根本不可能出售。第一間是林鄭月娥正在入住的政務司司長官邸；第二間為前三軍司令官邸，根本屬無價寶，問價者，肯定「政治不正確」。

　

　　幸而，第三間，應該有得傾，正正是袁天凡李慧敏夫婦的堡壘。於是，經紀開始做功夫。

　

　　袁天凡是何許人？香港著名打工皇帝兼前聯交所總裁，與香港首富家族關係非比尋常，觀市測市「鍊」價功力特高，在香港，肯定是頭五位星級人馬。面對馬雲這隻肥「蛤乸」問價，當然大口咬落，價位拿揑準繩，遇上意氣風發欲買心頭好的馬雲，一間天價屋就此扑鎚，帶挈經紀賺佣千多萬，可能經已退休去也！

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【etnet 30周年】多重慶祝活動一浪接一浪，好禮連環賞！ ► 即睇詳情