2018-09-04

快樂退休—何慰本影靚相、齊分享

　　智能手機及iPad面世，給我不少痛苦，包括右眼中風及左手腕管炎，前者因長期在黑暗中睇MON，後者因過去幾年左手凌空持手機，行又睇，企又睇，結果，日子有功，傷及筋骨。

　　食得咸魚抵得渴，現代人，難道不用手機？故只好改變習慣。因為，這種科技，帶來太多樂趣了，包括聯絡上久經失散的朋友。

　　小弟早年在香港電台電視部任導演時，認識了一位亦師亦友的長輩攝影師何慰本，佢不單攝影技術好，做人處事態度更一流。凡合作過的，皆豎起大姆指。

伙拍導演羅啟鋭攝製「獅子山下」

　　老何2003年退休，大家基本已失散。豈料，去年開始，面書之上，彈吓彈吓，彈出幾幅靚到 Dump Dump 聲的沙龍照，追查拍攝者，咦⋯⋯ 原來正是何慰本，退休後移民溫哥華，終日孭住相機拖住老婆，去到邊拍到邊，拍得靚相，立即與天涯海角老友分享。

踏破鐵鞋只為拍一幅沙龍

快樂退休生活，拖住老婆去攝影

　　轉轉接接，終於聯絡上，但覺何兄乃一個快樂退休人辦，立即請教心得為何？

　　「阿碌，退休，不可以等殺到來才適應，做政府工或大機構，既然早知何年何月何日要退下來，就應早早部署，在經濟、心態、健康等各方面，預先安排妥善，如此，就不會出現『退休震盪』！退休，應該是快樂的。因為，時間完全屬於自己，可自由自在選擇生活方式，再冇老闆、同事、下屬、顧客⋯⋯等必須處理的公事關係。這時，理應進入第二個重要階段—隨心而活，隨遇而安，集中精神時間去享受六十歲前因工作而被迫放棄的興趣！」

　　何慰本的興趣，正是攝影。此君對周遭人、事、物的觀察力特強，故經常可以捕捉到世界上最美的一面。