《Make Money》新手點抽新股？一文睇晒懶人包！

　　本欄宗旨得一個，就係幫大家開心Make Money。上次我哋曾經提過新股識抽可以好好油水。近排新股市場好似熱鬧返，之不過，原來好多人都唔係太清楚抽新股嘅程序，今次《Make Money》就同大家整一個懶人包，等大家都可以喺新股市場賺多個錢！唔講咁多，去稿！

 

1.抽新股如同買六合彩，識開戶口先有著數

 

　　IPO(Initial public offering，首次公開招募)，即係當一個間公司計劃上市嘅時候，公司就會拎一部分股份作公開發售，如果投資者有興趣，就可以入飛抽股。咁究竟點樣入飛呢？傳統方法就好似我阿媽個年代咁，一個個去銀行排隊，拎本「電話簿」(招股書)同一份所謂「白表」嘅股份申請表格；不過今年都2020年啦，大家去抽新股主要有兩個途徑：券行同銀行。

 

（Shutterstock圖片）

 

　　去券行開戶口其實同去開張圖書證咁簡單，只要帶身分證、用嚟出入款嘅提款卡同住址證明就搞掂；然後入錢落戶口，想抽邊隻新股，同經紀講聲就得。另外，市面上好多銀行，都會有埋證券買賣同抽新股服務，詳情要問返各大銀行，不過通常E-BANKING都會有埋顯示，簡單易明。

 

2.銀行vs券行大比拼！

 

　　上網喺銀行抽新股就梗係快靚正，因為Click一下就從自己戶口扣錢，然後自動幫你申請，但留意返，銀行係會收取服務費，就算抽唔中都照收返你一舊水，有時真係幾肉赤！

 

（資料圖片）

 

　　喺券行做，雖然係麻煩啲啲，又要入錢又要影返張入數收據過去，但勝在服務費低，抽新股幾十蚊就有交易，有啲重講到明「不成功不收費」！真係抽多幾隻都唔怕！有啲券行仲提供埋「暗盤」交易服務添。

 

　　所謂「暗盤」，通常指券商係新股份上市前一個交易日，開放一個屬於該券行嘅交易池，等「中獎」嘅投資者係上市前一日「偷雞」交易。暗盤嘅好處就係，如果睇中隻股又抽唔中，就可以喺暗盤到落單買入；而如果你係「中獎者」，想提早獲利又或者見個市唔對路，都可以提早離場。

 

3.做孖展提高中籤率VS實彈抽穩穩陣陣

 

　　好多人話「炒孖展」好高風險，但孖展放落新股到又點呢？其實孖展即係所謂嘅「保證金」，簡單嚟講就係券商提供貸款畀你抽新股。

 

（資料圖片）

 

 　　例如一隻新股招股價1蚊，每手一千股，你手上得1千蚊嘅話，用現金抽就最多抽一手；但假如借盡九成孖展，就可以抽十手、價值一萬蚊嘅股票，而你只需要放1千蚊保證金落戶口就得。另外，券商計息嘅日子，通常係由截止抽飛日至上市第一日，通常只有8至9日左右，而且年利率都係兩、三厘，幾乎抽10幾萬先收你百幾蚊息，啲息真係平到笑。

 

　　借孖展刀仔鋸大樹，好處在於避免自己資金被鎖死，而且利息特平，若遇上一啲大熱新股，重可以提高自己中獎率！不過借錢抽股都有一定程度風險，假如突然市場大變，畀到你成手係貨，焗住一上市就要止蝕掟，就真係……所以，入飛時真係要仔細考慮好自己?財政同承受能力呀！

 

4.大型新股人人抽，有名氣就有鑊氣

 

　　一年有咁多隻新股抽，究竟點樣落手好呢？其實大部分投資者抽新股主要睇兩樣?：公司名氣同孖展額度。

 

　　公司名氣大、多人識，喺新股市場最殺食，例如阿里巴巴(09988)回歸港股，個個爭崩頭一手難求。事實上，新股背後若然有個大孖沙做股東，又或基石投資者加持，都會令佢「鑊氣十足」，人人趨之若鷔！

 

（資料圖片）

 

　　另一方面，入飛期間各間大型券商都會公布新股嘅借出孖展額度，呢啲都係重要資訊！因為反映咗市場有幾多熱錢追捧緊佢，假如首日孖展額度都已經超額幾十倍至百倍，就證明佢係大熱分子，入飛當抽六合彩！

　

5.新股炒供需業績反其次，留意保薦人往績

　

　　究竟新股使唔使睇業績呢？呢個問題真係好奇妙，好似生物科技股咁，大部分都係未有盈利情況上市，但呢一期就隻隻「起飛」。事實上，新股炒賣好多時候都係炒緊市場供需，即係如果新股「派貨」(公開發售股份)好少，但係投資者熱熾追求，炒得起嘅機會大增，因為需求比供給大，中學經濟都有教啦！

 

（Shutterstock圖片）

 

　　仲有，保薦人都係大家要留意嘅，因為保薦人喺過往保薦過嘅股份，首日成績犀利嘅話，都會成為投資者入飛嘅借口。所謂「個莊做得好，實有好路數」，保薦人被視為「馬房」，如果一間好馬房，隻馬衰極都有個譜啦！

　

6.咩係一手中籤率？超購倍數決定表現？

 

　　新股公布中獎結果時，都會講「超購數倍」、「一手中籤率%係…」之類，究竟呢啲數字係點解呢？

 

　　所謂超購，即係公開申請股數比起公開發售股數超出幾多，例如早幾年「天仁茗茶」經營商賓仕國際(01705)就超購2599倍，要抽500手先有1手，中獎率真係難過登天；但愈難中獎投資者愈追貨，所以佢1蚊招股，首日炒到上接近8蚊，真係肥過肥仔水！

 

（資料圖片）

 

　　而所謂一手中籤率，即係係抽新股嘅程序下，究竟抽一手嘅散戶中獎機率有幾高，通常如果人人中獎，又或者有幾十個巴仙，意味貨源太散，散戶太多，升幅有限；但如果一手中籤率得幾個巴仙，則意味貨源大部分都係大戶手上，散戶好少貨；喺貨源歸邊情況，大戶持貨力較強，股價比較容易炒上去。

 

　　抽中幾時放？除非你真係好睇好某隻股份，想長期持有；好多時新股喺首日嘅價位通常係短線最靚(或接近最靚)。師傅教落：「新股不過十二點」，即係炒賣新股最好唔好持貨到中午收市，無論贏輸都要離場，無謂贏粒糖輸間廠啦！

 

　　另外，提提大家，沛嘉醫療(09996)同建業新生活(09983)喺周四(7日)就會孖展截飛，周五(8日)就係公開認購截止日，如果有興趣嘅朋友仔記得快啲入飛啦！溫馨提示：投資涉及風險，要思考清楚自己嘅風險承受程度。都喺嗰句，要開心Make Money，如果有半點憂心，就賺到都補唔返啦！

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【你點睇】陳美寶、羅淑佩分別被任命為運物局及文體旅局局長，你是否認同新任命有助香港鞏固物流樞紐地位及促進旅遊經濟？► 立即投票