《Make Money》人氣網紅密密賺，老友收息唔使煩

　　香港人最大嘅夢想梗係唔使做又有錢收，但其實要實現夢想都唔係咁難，只要「被動收入」打理得好，自然可以生錢出嚟啦！所以今日我哋嚟一集後生仔同老友記嘅被動收入大激鬥，睇下個邊先係「印印腳，有收入」嘅最終王者啦！

 

(Shutterstock圖片）

　
老友記穩陣收息股，退休人士最佳選擇

 

(Shutterstock圖片）

　　好多老友記去到咁上下大，就會分配好自己嘅資產計劃，可能係買股票收息；而事實上香江人好早期已經有呢個觀念，特別係老友記最喜歡嘅大象（00005），貪佢個價夠穩陣，年年有息派，季季有錢收，唔少人仲當佢係傳家之寶，一代傳一代添！之不過，而家嘅大象……算罷啦！

　　唔使失望，孖屐仲有好多值得買嚟收息嘅股份，例如同以前嘅大象一樣，都係一年派四次息嘅中電（00002）同恒生（00011），預期息率分別有4.21巴仙同4.59巴仙，每季都有零用錢分，荀呀！不過，有啲劵商每次代收股息都會收一筆固定費用，所以選股時要連呢樣一齊考慮。又或者，既然諗住長揸收息，一於上過戶處轉埋自己個名，咁就一勞永逸，Very Good嘞。

　　另外，內銀有阿爺撐住，都可以諗諗，預期息率最高係有5.73巴仙嘅郵儲行（01658）；中行（03988）同建行（00939）每日成交量夠大，有起咩事上嚟唔驚套唔到。要提提，神州係要收一成股息稅嘅，老友記留意返啦！

　　另外仲有一隻，係預期息率逾６巴仙嘅香港電訊（06828）。事實上，全球係咁放水，搞到孖屐水浸，銀號定存息率愈嚟愈低，傳統銀號一年期定存息率最高嗰間，都係得1.03厘，即係放100萬入戶口，得一萬零三百銀咁大把，完全跑輸通脹。雖然買股除淨喺股價反映返派息，遇上跌市仲會有賺息蝕價嘅風險，但如果揸隻穩穩陣陣嘅，預咗長揸，就Let go la！


　

後生仔做KOL「些牙」知識，收入其實和味！

 

(Shutterstock圖片）

　　上網學嘢最驚貨不對辦，又或者個導師講到一舊舊，到時乜都聽唔明。不過，新一代後生仔其實有自學能力，學得好又可以同大家開心「些牙」，所以如果真係有心教人，而人哋都見到你嘅誠意，相信都會有人願意課金。

　　疫情關係，好多人多咗時間留喺屋企，自然要搵方法娛樂或者增值下自己。而我哋教授嘅知識未必需要好專業，可以係自己嘅興趣，例如插花、煮嘢食、玩模型都可以。以我哋最常睇嘅Youtube為例，睇片時會插有廣告，當觀眾睇咗30秒以上或者完整廣告，就會有得分，平均每1000views，會收到10蚊，即係一條１０萬views嘅片，就有1000蚊啦。

　　而Youtube喺香港區嘅會員贊助，每個月係25蚊，平台會抽三成，Youtuber有17.5銀。如果開直播，仲可以收到Super Chat同Donation添！

　　除此之外，比較出名嘅收費平台有MEDIUM同Patreon，MEDIUM係專畀人出文章嘅，但佢唔會公開具體點分成，所以透明度好低。依家比較多人用嘅係Patreon，除咗文章之外，可以擺音樂、mv、漫畫等等，可以自訂收費金額，平台會抽5到12巴仙左右。

　　不過，揀得呢個方法，就要預咗前期「被動」收入較慢，仲要投入好多時間同心機，累積一定流量同名氣，往後就係收成期啦！

 

撰文：吳藹林

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【與拍賣官看藝術】走進Sotheby's Maison睇睇蘇富比旗艦藝廊！蘇富比如何突破傳統成規？► 即睇