【Make Money】後生仔炒美股風行，係咪真係咁好搵？

 

　　股票谷成日都笑言，港股如「港女」一樣，難以捉摸，買跌就升買升就跌，唔少人損手爛腳之後，就發現原來美股好玩好多，成日都單邊大抽升，所以近期討論區都出現好多「少年股神」都係玩美股為主。究竟美股係咪真係咁好搵呢？點解咁多後生仔呢一期都轉場炒美股呢？美股期權又係咪咁容易賺？今集Make Money就同大家深入淺出解構美股入門101！ 

 

迷思一：港股多「妖股」，美股投資者多難以操控股價？

 

 

　　港股過往有好多唔好嘅印象，包括有莊家「搭棚」炒高股價，只要有散戶落搭就立即散水，散戶損手爛腳，自此呢類股就被稱為「妖股」。有人認為，美股相對地呢種情況較少，因為全球投資者都好容易參與美股市場，加上兩地股市準則不一，要做到好似港股七成幾貨源歸邊情況較少，事實上又係唔係咁呢？

 

　　事實上，美股市場一樣有「妖股」存在，而且升幅往往都係幾十倍咁升，因為「妖股」受影響嘅因素，除了消息面外，仲有股份嘅期權合約被砍倉、沽空等因素，都對正股有決定性影響。就好似最近GME（遊戲驛站）事件咁，就係因為有人發現沽空機構嘅沽空數多於流通股份數，所以一大班散戶「夾淡倉」夾死沽空機構。睇返連登討論區，唔少後生仔借學費炒GME，最後輸剩幾千蚊，真係一殼眼淚。

 

迷思二：買賣美股方便好多，背後有好多「代價」

 

 

　　後生仔喜歡炒美股，主要由於美股可以一股一股買，對於本錢少嘅後生仔來講確實係唔錯選擇！而且美股期權合約入場費同香港牛熊證差唔多，幾百蚊就買到一手，上落波幅大，真係好似入賭場咁興奮！

 

　　咪住！雖然話而家炒賣美股相當方便，但背後其實有好多代價！第一就係匯率問題啦，基本上本港美元兌換嘅買入賣出價都有0.05差距，就好似匯豐今日嘅電匯銀行買入及賣出架分別係7.7373及7.799，兩者價差已經有0.0617，所以未見官已經俾銀行食咗一舊。

 

　　其次就係要留意返每間美股證券交易商嘅佣金收費，本港部分可交易美股嘅券商聲稱收取每筆訂單0.99美元，睇落好似好低咁，但如果炒波幅或期權、甚至係ALGO交易，每日交易幾百次，交易費用就可能涉及千蚊以上港紙，所以要計清楚啦！

 

迷思三：阿里百度港美都有上市，點解投資者仍選擇美股？

 

　　早幾年港交所開通「同股不同權」，就係想為香港市場爭取更多科技股回歸；加上中美貿易戰持續，唔少美國中概股都開始陸續回歸港股市場，而家香港都已經有得炒阿里（09988）、百度（09888）啦！仲有BILIBILI都係剛剛截飛，咁點解投資者依然會選擇美股市場呢？

 

　　背後原因，其實都係回歸基本：美股入場費較低，而且目前美股仍處於技術性牛市當中，相對地都係較港股穩定。仲有一點，美股派息係按「季」計算，而且會提早公布，投資者可以提早做好預備；而大型市值公司嘅股份，股價唔容易被人操控，所以令到投資者可以安心投資，因此美股咁得投資者歡心唔係無原因！

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【你點睇？】政府擬立法規定所有的士須於車內安裝攝錄設備，你是否認同？ ► 立即投票