《經濟不停學》沽空風險無限大，港股美股玩法小不同

  　　GameStop（遊戲驛站）因為散戶沽空事件，近排真係上晒位，明明根本冇做過啲咩，又有人準備幫佢出書、拍電影又乘，主題一定離唔開「沽空」呢兩隻字。識嘢嘅人會知道沽空風險係無限大，跟本唔抵玩，而港股同美股沽空嘅規則有少少唔同，真係要玩嘅就留意下啦。

 

 （Shutterstock圖片)

 

沽空即買跌，賺價差搵大錢！

 

 （Shutterstock圖片)

 

　　「沽空」（Short）嘅意思係，投資者期望某隻股份短期內會向下跌，於是係未有持有股份情況下，預先同券商訂立合約「借貨」，並以某個價格沽貨畀市場買家；而合約限期前，投資者就係市場上低位撈貨還返畀券商，只要市場上撈貨價格低過與沽貨畀買家嘅價格，就會形成「價差」，沽空者咁會就可以透過價差獲利啦！

 

　　如果投資者係香港想玩沽空，可以喺券商度開「沽空戶口」，然後就可以向券商借貨高位沽咗先；隨後當股價跌，喺低位買返同還畀券商，行內稱為「平倉」。當然啦，投資者喺沽空嘅時候，需要畀指定按金同利息；但若果股價回升，投資者就要高價買入股票歸還填數。理論上，股票向下跌最多變零蚊，但向上升就係無限，所以沽空風險都變成「無限大」啦！

 

　　係美股GameStop事件，就有一班散戶眼見沽空機構對GameStop進行沽空嘅股數，大於市場上流通嘅數目，所以原則上沽空機構係無辦法全部平倉，有美國論壇Reddit會員見到後，就放上金融版討論，最後引來一大班散戶入市炒高個價，逼到啲沽空機構要高位接貨平倉，而散戶就可以乘機套現賺返筆，呢個行動就叫「夾淡倉」。

 

香港玩沽空門檻高，唔係隻隻都可沽空

 

 （Shutterstock圖片)

 

　　喺香港，想玩沽空嘅門檻都幾高，沽空港股前要填稅務局嘅證券借用及借出協議登記表格，交埋首次稅局登記費三舊水。每次交易至少要沽空一手，仲有限價沽空，唔可以低過當時最好嘅沽盤價進行，啫係沽空盤要擺喺賣出價一方，要有主動買盤先可以成交，避免有人借沽空質低個價。

 

　　目前港交所容許沽空嘅股份的暫時得936隻，當中大部份係股票，亦有ETF，而對同股不同權、第二上市、非上市可交易證券、人民幣計價、未有盈利嘅B仔股冇限制，不過至少要符合以下一個準則：市值至少要有30億，而且剛過去12個月嘅總成交量對市值嘅百分比至少有六成；喺交易所／期交所買賣嘅股市指數產品嘅相關成分股；喺交易所／期交所買賣嘅股票期權嘅相關股票。

 

　　另外，上市唔足60日嘅半新股，市值要有800億，而由公眾人士持股嘅市值，要喺上市後第二個交易日起連續20個交易日至少有200億，同埋該時段內嘅總成交額有5億。之前見過有人喺網上教人「反擊微信女」嘅方法，因為一早知道佢哋推介嘅股份會暴跌，於是沽空會賺返喎，不過係人都知微信女推介得嘅多數係低成交細價股，根本冇得咁玩，呢個所謂方法，真係得啖笑囉！

 

美股沽空玩法略不同，一股都沽得！

 

 （Shutterstock圖片)

 

　　至於美股沽空有過千隻可以玩，唔使同政府部門申請，沽一股都得，除非股價單日急挫一成或至上，喺正常情況下唔設限價沽空規則；而借出美股股票嘅股東，係有權隨時要求收番股份，尤其係股價急升嘅時侯，投資者可能會即日收到通知要即刻平倉，分分鐘蝕到攤攤腰。

 

　　另外，有一點值得留意，就係沽空者雖然係市場上沽出股份，但股票擁有權係屬於借出者（即券商），如果遇到公司企業突然宣布派息，呢份息都係屬於借出者，而沽空者需要支付呢個分紅！所以如果玩美股沽空人士，記得避開公布業績前後買賣，一陣「還息」牙都痛埋，無謂啦！

 

撰文：吳藹林

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【你點睇？】恒指在2024年先跌後升，你點睇2025年港股走勢？► 立即投票