《經濟不停學》小學雞學堂8：牛熊證初階攻略！

　　坊間唔同券商其實都有講牛熊證基本原理、買賣注意事項之類嘅教學，不過個啲都只係基本嘢，就算熟讀晒去玩「動物」嘅人，起初都應該交唔少學費，因為牛熊理論博大精深，以小博大當然刺激，不過隨時贏粒糖輸間廠。所以今集小學雞學堂就同大家由淺入深，同新手們講解下炒牛熊有咩要注意啦！

 

（Shutterstock圖片）

 

預備篇：牛熊一日買賣幾十次，搵啱券商好緊要

 

 

（Shutterstock圖片）

 

　　牛熊證唔同正股，因為上落大嘅情況下，多數都係以炒波幅為主，正常一日內買賣十次八次係好正常，筆者高峰時期一日出入四、五十次（往後有機會同大家解釋），所以搵一間好嘅券商係好緊要。近年來，有券商主打「一世免佣」，咁就啱晒炒牛熊投資者，因為呢啲券商每次交易只收手續費，令到交易成本大大降低，咁樣先可以保證到自己嘅利潤提升。

 

　　另外一點，炒牛熊宜用電腦，最好配置兩個螢幕。因為用手機容易有信號接收問題，一秒幾個價位會有延遲情況；而需要兩個螢幕，一個係負責買賣系統，另外一個係負責國際新聞、本地新聞以及大市走勢。正所謂「工欲善其事，必先利其器」，呢啲錢真係唔好慳啦！

 

揀證篇：齋睇槓桿比率無意思，睇換股比率較實際

 

 

（Shutterstock圖片）

 

　　相信唔少新手炒牛熊都有個難題，就係點樣揀證好，牛熊證提倡「以小博大」，所以唔少教學都叫大家留意桿槓比率，槓桿越高升得就越急，風險都會越大。事實上，當投資者真正落場時候，想揀一隻合適自己嘅牛熊，睇換股比率可能比桿槓比率更實際，因為炒牛熊甚少會由低至高咁食晒一日入面嘅升浪，常見都係食到十幾格就離場，所以牛熊證同正股／指數嘅敏感度就相當重要。

 

　　以恒指牛熊為例，常見嘅換股比率有10000、12500以及20000。理論上，意思就係恒指每跳動10點、12.5點或20點，你隻牛熊就會跳動1格。如果投資者想刺激啲就可選擇10000換股比率牛熊；想保守啲就可選擇20000。

 

　　此外，揀證時都可以同樣留意成交量，選擇一啲街貨較高嘅牛熊，當你交易時後都比較容易買到平貨或出貨，因為牛熊證採取「莊家制」，發行一隻牛熊證嘅券商，都必須係呢個證開一個買盤及賣盤，而莊家開嘅買賣盤價差有時會相差兩至三格，變相比較難達成交易。簡單嚟講，如果買賣高街貨量嘅牛熊證，好多時就係你同市場投資者博弈；如果買賣低街貨量嘅牛熊證，就係你同莊家博弈啦！

 

風險篇：以小博大睇收回價，過夜牛熊心驚驚！

 

 

（Shutterstock圖片）

 

　　另一個要留意嘅地方，就係睇牛熊證嘅「收回價」，行內俗稱「打靶位」，通常離收回價越遠，證價就越貴，槓桿比率就越低，反之亦然。繼續以恒指牛熊為例，唔少喜歡刺激嘅投資者，都喜歡買0.025至0.035元嘅牛熊證，因為呢個範圍嘅證槓桿比例比較靚，投入成本比較低，同時距離「打靶」重有些少距離，唔對路隨時離場都可以輸小啲；當證價去到0.08元至0.1元，佢可以再攀升嘅幅度已經有限，同時投入成本已經好高，如果想賣的話已經唔太適合啦！

 

　　而有一種投資者喜歡玩「過夜」，即係手持牛熊證至收市，來估計明日高開定低開；甚至「過六日」，等待周一開市。呢種玩法其實等同買大細，投資者要面對唔少心理壓力。不過，出現呢種玩法可能細係因為翌日將會出現一啲可預測嘅政經事項，例如：議息、經濟數據、股份業績公布，亦反映投資對未來看好／好淡嘅一種睇法。

 

撰文：李皆穎

 

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【你點睇？】美國總統大選在即，你認為誰將最終當選？► 立即投票