「沒有最亂，只有更亂」係依家香港面對嘅情況，而亂嘅源頭，雖然唔同光譜有唔同睇法，但確實一隻手掌拍唔響，自己唔去檢視自己嘅錯誤，香港嘅亂局短時間內都無辦法解得開。

　　好多人都話，今次亂局源起政府，應該由政府埋單。的而且確，今次香港有史以來政治最動盪嘅時刻，能夠解困嘅亦只有政府，但政府由始至終都係不斷做一啲錯誤嘅決定去令到亂局更亂，由「壽終正寢」到「撤回」、由親口講唔需要立蒙面法到最後又立但又被法院裁決違憲，一單又一單都令到港人完完全全唾棄呢個政府。

　　上星期至今，林鄭先後約咗建制派不同陣營會面，解釋政府近來所面對嘅困難同點樣拆，而建制派當然最關心就係嚟緊星期日嘅選舉係唔係「The show must go on」。不同建制陣營收到嘅訊息都係一致，就係林鄭呢一刻係不惜一切、堅決要進行區議會選舉，縱然唔少建制候選人認為整場選舉對佢地非常不公平，但林鄭去到中大、理大事件之後，呢個想法仍然係無變過。

　　Tina同好早之前曾經預計會流選嘅建制派打聽，佢話當時林鄭的確係諗停止選舉係比較啱嘅策略，想法大變，好有可能係「面聖」之後作出改變。呢位建制中人指出，從林鄭見建制派時多次「卑躬」道歉，指繼續選舉係連累咗建制派、辜負大家嘅支持嚟睇，林鄭今次明知建制輸得極難睇仍然硬選，係希望透過市民喺選舉對政府投下不信任票（將票投畀非建制派），等和理非市民可以消吓氣，盼望今次選舉令到動亂能夠有喘息嘅空間。

　　Tina一聽到呢個講法，即時碌大一對已經大無可大嘅眼，叫咗句：「佢唔會天真成咁卦！？」建制中人顯示出一個無奈嘅表情，「如果唔係咁，點解要犧牲建制派？講緊一個立法會席位同117席選舉委員票呀！？唔係阿爺ok，你覺得林鄭會夠膽呢場豪賭！？」

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

【你點睇？】政府擬立法規定所有的士須於車內安裝攝錄設備，你是否認同？ ► 立即投票