財爺陳茂波噚日公布咗最新一份財政預算案，事前喺建制派「大合奏」要求派錢之下，陳茂波亦都抵受唔住呢份龐大壓力，開倉人人派一萬，符合市場預期。喺政府關又封唔好、口罩又買唔到、隔離又隔到離晒譜之下，派錢絕對係最合適、最有效嘅抗疫措施。

　　派錢係共識，派1萬Tina亦覺得係適合嘅金額。不過全民派錢亦總會有唔公平，有移咗民N年無喺香港交稅嘅永久居民，一樣可以收到1萬；但亦有喺香港住未夠七年但日日捱騾仔嘅新移民，可能喺半失業狀態但今次派錢係無佢份。呢個時候講支持政府係要勇氣，但派錢以最簡單直接幫到最多嘅人係最正路嘅做法，設更多收錢限制只會拖得更長，學返上次劃一向永久居民係直接，呢方面係值得支持。

　　普羅市民一般關心政府點派錢，但其實大家亦應該關心政府平時係點樣使，特別係經常開支。睇返政府盤數，今年預算經常開支係4866億，比去年度大增一成，而同五年前相比，經常開支唔覺唔覺係增加咗五成之多。五成有幾多，林鄭話唔好同澳門比較，ok，咁最好就同新加坡做比較，大家人口有返咁上下。新加坡2020最新預算，政府開支係836億坡紙，而五年前只係682億，即係五年間只係升咗22%咁上下，(唔好忘記，人地係包括埋國防開支)香港政府嘅理財哲學，特別係自己使錢嗰方面，已經將審慎拋咗入維港。

　　相信唔少讀者理財時都面對過一啲情況，就真好多時候，使慣咗使大咗，真係縮唔返轉頭，政府財政其實同個人理財係一樣。錢，用得其所真係無乜大問題，始終政府使錢，好多時都當係投資社會，係有機會賺返轉頭；但過去五年香港使多咗咁多，普羅市民又有無覺得自己生活係好咗、前景係美滿咗、對政府嘅信心係大咗？如果答案係否定嘅，咁錢又使咗、生活又無好咗，仲要愈使愈多，咁將來又點畀到安穩香港人？

　　立法會係為政府花錢把關嘅地方，過往只有泛民喺呢方面刁難過政府，但其實都做唔到啲乜，建制派各黨派喺政府應「你哋」所求派咗錢之餘，唔該亦盡返議員嘅責任，唔好好似以往合埋眼就開綠燈畀政府，好好睇住「香港人」個大荷包。

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

【etnet 30周年】多重慶祝活動一浪接一浪，好禮連環賞！ ► 即睇詳情