你唔想埋個頭喺政治入面，但政治終歸都係會搵上門，應門嘅係香港人最尊敬嘅醫護專家袁國勇教授。

　　袁教授同佢徒弟龍振邦一篇文章翻起千重浪，而文章出街一日之後，最終抵受不住「政治壓力」而撤回文章。

　　文章出問題嘅地方有三個。一，係對台灣嘅稱謂，呢個無可置疑，錯就要認。二，用「武漢肺炎」稱號新冠病毒無問題，通俗易明，方便溝通，而袁教授都有重申，醫學研究之類嘅一定要沿用返COVID19呢個名。雖然世衛2015年已經通過命名新病毒係唔可以用地名以免引起歧視，但其實一般新病毒出現流行情況到世衛插手係有一段時間差，以現時全球資訊泛濫年代，無可避免一開始媒體都係會用地域去命名，約定俗成同叫BB嘅花名一樣，叫慣就難改口，袁教授所言確無錯。

　　第三點，文章中提到病毒源自美國之說是「毫無實證，自欺欺人，勿再亂傳，以免貽笑大方」，呢一點，就明顯係袁教授自己將隻腳踩入政治旋渦。喺中美兩國在「源起」之說博奕之際，特朗普開口埋口「Chinese Virus」嘅時候，教授係都要講出呢個大家都了解明白嘅事實，等同佢出份研究報告證明自己係「政治盲」一樣。單係呢一點，Tina都認為，袁教授撤回文章係明智之舉。

　　不過成篇文，袁教授文章帶出嘅一個最重要嘅信息，喺以佢嘅傳染病專家角度來看，爆發任何「毀滅性」嘅傳染病之後，作為人類，不分種族，都係應該要全面了解爆發原因、抗疫措施等等有乜嘢不足，要用盡一切辦法去避免令自己重蹈覆轍。Tina深信，作為一個真正愛國嘅中國人，特別係有知識、有能力去堵截疫情嘅專家而言，03年沙士一次教訓之後已經多次提出警告，17年後再一次「可能」因為相同嘅原因而令咁多人受害，又點會唔心痛，又點會唔想擢著痛處希望國人改變呢個壞習慣呢？

　　錯，只錯在「太坦白」。

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

【你點睇？】財政預算案展開公眾諮詢，學者倡問責官員減薪並削減公務員編制，你是否認同？ ► 立即投票