「41票贊成，1票反對，零票棄權，我宣布草案獲得通過！」  喺立法會主席梁君彥快刀斬亂麻之下，俗稱《國歌法》嘅《國歌條例草案》喺其中一個極敏感嘅日子——六月四日正式喺立法會通過；相信建制派之外，舒咗一口氣嘅肯定仲有去完北京返來嘅特首林鄭月娥。

　　經歷完去年六月嘅修訂《逃犯條例》之後，《國歌法》被泛民形容為最「妖魔」嘅法例，係一條惡法，大大損害港人「不愛國」嘅自由。泛民之所以要咁做，無非都係要Keep住反修例事件泛民支持者嘅反政府「熱情」，令到泛民繼續喺嚟緊立法會選舉上面好似區議會咁再創奇蹟。但觀乎兩星期嘅立法會辯論，立法會內外，形成咗一重好唔尋常嘅熱同冷。

　　議會之內，泛民保持熱度。繼上星期民主黨許智峰首次動用「臭蛋」攻勢癱瘓議會運作近半日之後，噚日六月四日陳志全同埋朱凱迪更係「臭味雙投」，雙雙潑出劇臭液體，再次阻延議會進行。其後復會，梁君彥唔理三七廿一直接畀官員回應，直向三讀達陣，泛民齊齊離座向住佢叫「大口狗！遺臭萬年」，梁亦罕有咁「忍辱負重」，最終完成點票三讀通過，議事堂內，臭與熱互相交融。

　　但喺場外，真係想唔到咁冷淡。立法會附近警方可謂重兵駐守，得返一條路可以行到去立法會，出入嘅人都要查證。不過警察未有受過半分挑釁，幾日嘅辯論期間，未見過任何抗議示威行動，更無人打算重演612事件。場外嘅氣氛，冷靜到令人覺得香港已經復元重回正軌，直至晚上紀念六四活動再有衝突，Tina先至如夢初醒。

　　建制派對於呢份「冷」顯得有啲失預算，讀者應該都見到建制派為呢場仗做足準備，點知全部用唔上。事後有建制派坦言，唔會傻到覺得黃營市民轉而認同《國歌法》，某程度上黃營只不過係將焦點去晒《國安法》、去晒拎唔拎BNO身上。而事實上，從其他國家嘅反應亦睇得出，《國安法》對香港實質嘅轉變同影響，係大得多，難怪黃營市民冷待《國歌法》。

　　至於場內嘅「熱」，泛民都係來個一箭雙鵰。喺議會入面嘅連番動作係做畀支持者睇，但做得嚟又唔能夠太過分，例如動粗傷到立法會保安嘅話，隨時被控連下屆都唔使選；泛民集體唔投票亦係罕見之舉，目的亦好明顯係唔想留下「反國歌法」嘅尾巴，以免畀選舉主任捉住嚟DQ。

　　無論如何，香港嘅政治氣氛肯定無冷卻嘅本錢，問題只係熱度可以去到幾盡。

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

【你點睇？】以伊衝突升級，北韓派兵增援俄羅斯，你會否擔心世界發生大規模戰爭？► 立即投票