今年與火猴共舞 如何樂在其中？

　　丙申是火猴，丙為烈火，所以隻馬騮仔好火！

 

　　時興crossover，談到生肖，動物與人也會產生有趣的fusion。

 

　　去年初說在羊年，人的羊羣心理會特別澎湃，已應在：

 

　　一、集體中招：如鉛在水中、裸在聊中、騙在電話中……等。

 

　　二、大遷徒：歐洲難民潮。

 

　　三、收購合併頻繁：Bloomberg稱去年M&A破記錄。

 

　　羊有羊性、猴有猴性，猴子又會給我們甚麼啟示呢？

 

 

　　一、機靈變動：2016年開局已很濕滯，春季料無多大起色，農曆五六月屬全年精華所在，跟住又沉過。在此風高浪急之秋，一定要學猴子般機靈，迅速走位，甚至火速走頭，凡事都要預先策劃後著，勢色唔對，立刻挾住條尾走。

 

　　二、擁抱創新：猴性好奇、喜新事物。當我們覺得條路唔係幾通，就要找個新角度，咁你搵唔到度門，都會搵到個窗吖！

 

　　三、小心意外：猴子精力旺盛，愛刺激。但丙申年猛火尅金，喻血光之災，多交通意外，或旅遊事故。就算在港，也要注意道路安全，揸車或行路，不要只顧傾偈或打手機，無謂樂極生悲。

 

　　四、切忌燥動：馬騮本來就好衝動，加上丙申年，真係火燒馬騮仔，可以想像幾狼狽！今年會有特別多令人激氣、拗氣、洩氣的事情，不要立刻起火，要當自己係暫時boot唔到嘅電腦，這種延緩反應，對你一定有著數。

 

　　五、嬉戲作樂：猴擅玩耍，猴年賺錢艱難，不如把心一橫，一有機會，就enjoy yourself，歡樂今宵，懶理明朝，心理肯定得到平衡。

 

再說生肖運程：

 

　　猴：馬騮最大缺點是不專注、周身癮、冇時停，今年將會加速頻撲，不過咁係好嘅，犯太歲若應在周圍騰，就恭喜你咧！2016要控制自己的集中力與紀律，避免交通意外事故。又唔好似馬騮咁八卦，乜嘟哄一餐，特別要慎言，無謂惹是非。

 

　　虎：老虎今年沖太歲，可能唔見咁D錢，因此若有鴻圖大計，今年要小心，尤其是下半年，會有突而其來的衝激。還要留意健康，弱點在肝，勿過勞傷肝、或因事而大動肝火。

 

　　蛇：刑太歲、即hi倒D啫——可能有人攪針對。不過亦有人無條件保你嘅，唔使驚！

 

　　豬：今年害太歲，其實係被太歲害：要小心是非訴訟，幸有女貴人相助，財運仲唔錯添。

 

　　有問題的生肖，就數以上四件。羊咩去年雞毛鴨血，今年可以過番D好日子，愛情運唔錯噃。

　

　　無論太歲對你有何影響，今年都係學馬騮咁，最緊要好玩，祝各位2016，繽紛好節目！

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

《說說心理話》身體唔舒服查唔到原因？周身痠痛疲累？可能係患有心身症！點解原生家庭會長時間影響一個人？點樣脫離循環？► 即睇