圓潤之相 歡樂之家

 　　這家人的磁場特別好，雖然語言上常波來波往，互有勝負，但其不同世代共融的程度，真惹人羨慕。

 

　　一家四口，全都頭圓鼻圓、皮膚甚靚，這種相比較看重和諧，不喜confrontation，遇到可能發生正面衝突時，立閃！又父母眼神洋溢著慈愛與幽默，兄妹的眼神則充滿天真與佻皮，所以真正開片機會極微，但全都咀唇起啄，所以不免舌劍唇槍。

 

圖中人並非本篇人物，唯融洽氣氛近似。

 

　　「喂！你哋大個仔大個女囉喎，係咪要孭Ｄ飛先？」父親企圖令子女分擔一些責任。

　　「老豆！你辦事我放心啦！」兒子豎起姆指說。

　　「係我操心就真，你唔使冧我咧。」父親說。

　　女兒為了甩身，就用十分虔誠的態度說：「老豆！你係我嘅天時地利人和，你上啦！」

　　「喂！你哋都可以天地人合一個喎，呢Ｄ神功我咁多年來傳授咗畀你哋㗎啦！」

　　「嘻嘻！爸爸出場，喜氣洋洋嘛，係咁啦。」女兒撒嬌，技術高超，跟住兩人一齊閃！

 

　　老豆唔知笑好定嬲好。唉！青出於藍。

 

　　他出名叫鐵咀神針──鐵咀指能言善辯，兒女得此真傳，亦牙尖咀利，大家旗鼓相當。至於神針，稍後交代。

 

　　其子女與同學有時談及父母時，各人形容爸媽的絕技，包括鬧人、嚇人、點人、砌人、冧人等，這對兄妹亦笑談父親的絕活：

　　「我老豆最叻係篤人。」

　　「哎吔！係二五仔、無間道？」人問。

　　「唔係辦公室殺人事件。而係Ｄ人要求佢篤、排隊等佢篤、畀錢請佢篤，篤完仲要多謝佢。」

　　「係乜嘢金手指嚟？」

 

　　原來佢老豆係神醫，善於下針。其子亦於大學攻讀中醫，又活躍於學生會，肯定是未來社會棟樑，女兒精乖伶俐，亦打算循此途徑移動，兒女下課即回家幫老爹執藥，一家人合作無間，口水花四濺，真是美滿家庭，快樂有型！

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

樂本健【雙11感謝祭】雙重優惠、多買多賞► 了解詳情