如何Market平庸的高層

　　近年經濟唔好，好多公司早於上年尾已經開始Cut Budget。有啲公司可能生意未受影響，但老細們已有裁員嘅計劃，希望留多少少彈藥以備不時之需，減低結業嘅風險。其實公司經唔起風浪而結業，有時未必一定係老細問題，可能公司有個好叻、好有遠見嘅老細，但生意都可以係一潭死水。

 

　　做得老細，理當係Marketing高手，佢哋永遠站於高處看事物，較少接近前線，所以經常依賴一班高層們作方向性嘅決策，因為佢哋比較了解前線嘅情況，高層嘅判斷能力同工作能力就變成左右大局嘅關鍵。可惜，雖然老細好叻Market自己盤生意、Package自己嘅產品，但就住住唔識Package自己嘅同事，眼看高層們成日犯錯亦束手無策，令公司不見天日。如果你公司都有以下問題的話，就要諗諗公司如何成功。

 

 

蜀中無大將 廖化作先鋒

 

　　平均計算，一間中小企公司大約會有5-10 位高層，但好多時高層們都未必係「大將」，能夠擔得起大局嘅人寥寥可數。而有啲所謂嘅「大將」，佢哋有高層嘅霸氣，但就無高層嘅能力同氣量，係同事們口中嘅「空心人」。無實力嘅高層們大多會有舖「開會癮」，原因唔係佢哋得閒，而係佢哋希望透過不停嘅會議，以其他同事嘅能力去幫彌補自己嘅不足。尤其係同老細開會前，佢哋必定會捉大家一齊Brainstorm Idea，希望集各家之大成，以保自己烏紗。 

 

想變 但係唔變

 

　　成日開會呢個習慣，除咗會浪費同事時間之外，亦會為大家帶來好多煩腦，原因係佢哋開會時，永遠都唔會比方向大家，要大家盲無目的地去諗東諗西。然後當大家有結論嘅時候，又會因為唔啱佢心水而強行Reject，一直困於自己守舊嘅思想之中，最後甚至連會議最初嘅目的都可以忘記。如是者，多數開會最後都係為開而開，齋開會無結論，唯一一件可以決定到嘅事情，就係下次開會嘅時間。令到一個求變嘅會議，變成常規嘅吹水會。

 

只聘請「聽話」嘅下屬

 

　　自知能力有限，所以有啲高層鍾意請勁人入公司幫手。最初佢哋抱著求變、改革嘅心態，希望新同事會為公司帶來突破。一段時間之後，下屬猛將如雲，但突然間有一秒鐘會有「比下去」嘅感覺，害怕自己會被新同事所取代。就因為放唔低呢個心結，好多同事嘅發揮空間有限，工作有如投閒置散而辭職。喺呢個惡性循環之下，最後高層們只會請「聽話」嘅同事，陪佢一齊開常規嘅吹水會。

 

　　職場上每個人都係Marketer，要學懂如何Market自己嘅同時，亦要懂得Market每一個人、甚至一間公司。了解公司生意質素後，再看通公司管理層，你就知道呢間公司值唔值得投資、值唔值得留底。

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【與拍賣官看藝術】畢加索的市場潛能有多強？亞洲收藏家如何從新角度鑑賞？► 即睇